¹В день же той изшед Иисус из дому, седяше при мори.

²И собрашася к нему народи мнози, якоже ему в корабль влезти и сести: и весь народ на брезе стояше.

³И глагола им притчами много, глаголя: се, изыде сеяй, да сеет:

⁴и сеющу ему, ова падоша при пути, и приидоша птицы и позобаша я:

⁵другая же падоша на каменных, идеже не имеяху земли многи, и абие прозябоша, зане не имеяху глубины земли:

⁶солнцу же возсиявшу присвянуша, и зане не имеяху корения, изсхоша:

⁷другая же падоша в тернии, и взыде терние и подави их:

⁸другая же падоша на земли добрей и даяху плод, ово убо сто, ово же шестьдесят, ово же тридесять:

⁹имеяй ушы слышати да слышит.

¹⁰И приступивше ученицы (его) рекоша ему: почто притчами глаголеши им?

¹¹Он же отвещав рече им: яко вам дано есть разумети тайны Царствия небеснаго, онем же не дано есть:

¹²иже бо имать, дастся ему и преизбудет (ему): а иже не имать, и еже имать, возмется от него:

¹³сего ради в притчах глаголю им, яко видяще не видят, и слышаще не слышат, ни разумеют:

¹⁴и сбывается в них пророчество исаиино, глаголющее: слухом услышите, и не имате разумети: и зряще узрите, и не имате видети:

¹⁵отолсте бо сердце людий сих, и ушима тяжко слышаша, и очи свои смежиша, да не когда узрят очима, и ушима услышат, и сердцем уразумеют, и обратятся, и изцелю их.

¹⁶Ваша же блаженна очеса, яко видят, и уши ваши, яко слышат:

¹⁷аминь бо глаголю вам, яко мнози пророцы и праведницы вожделеша видети, яже видите, и не видеша, и слышати, яже слышите, и не слышаша.

¹⁸Вы же услышите притчу сеющаго:

¹⁹всякому слышащему слово Царствия и не разумевающу, приходит лукавый и восхищает всеянное в сердцы его: сие есть, еже при пути сеянное.

²⁰А на камени сеянное, сие есть слышай слово и абие с радостию приемлет е:

²¹не имать же корене в себе, но привременен есть: бывши же печали или гонению словесе ради, абие соблажняется.

²²А сеянное в тернии, се есть слышай слово, и печаль века сего и лесть богатства подавляет слово, и без плода бывает.

²³А сеянное на добрей земли, се есть слышай слово и разумевая: иже убо плод приносит и творит ово сто, ово же шестьдесят, ово тридесять.

²⁴Ину притчу предложи им, глаголя: уподобися Царствие небесное человеку, сеявшу доброе семя на селе своем:

²⁵спящым же человеком, прииде враг его и всея плевелы посреде пшеницы и отиде:

²⁶егда же прозябе трава и плод сотвори, тогда явишася и плевелие.

²⁷Пришедше же раби господина, реша ему: господи, не доброе ли семя сеял еси на селе твоем? откуду убо имать плевелы?

²⁸Он же рече им: враг человек сие сотвори. Раби же реша ему: хощеши ли убо, да шедше исплевем я?

²⁹Он же рече (им): ни: да не когда восторгающе плевелы, восторгнете купно с ними (и) пшеницу:

³⁰оставите расти обое купно до жатвы: и во время жатвы реку жателем: соберите первее плевелы и свяжите их в снопы, яко сожещи я: а пшеницу соберите в житницу мою.

³¹Ину притчу предложи им, глаголя: подобно есть Царствие небесное зерну горушичну, еже взем человек всея на селе своем,

³²еже малейше убо есть от всех семен: егда же возрастет, более (всех) зелий есть и бывает древо, яко приити птицам небесным и витати на ветвех его.

³³Ину притчу глагола им: подобно есть Царствие небесное квасу, егоже вземши жена скры в сатех триех муки, дондеже вскисоша вся.

³⁴Сия вся глагола Иисус в притчах народом, и без притчи ничесоже глаголаше к ним:

³⁵яко да сбудется реченное пророком, глаголющим: отверзу в притчах уста моя: отрыгну сокровенная от сложения мира.

³⁶Тогда оставль народы, прииде в дом Иисус. И приступиша к нему ученицы его, глаголюще: скажи нам притчу плевел селных.

³⁷Он же отвещав рече им: сеявый доброе семя есть Сын Человеческий:

³⁸а село есть мир: доброе же семя, сии суть сынове Царствия, а плевелие суть сынове неприязненнии:

³⁹а враг всеявый их есть диавол: а жатва кончина века есть: а жатели ангели суть.

⁴⁰Якоже убо собирают плевелы и огнем сожигают, тако будет в скончание века сего:

⁴¹послет Сын Человеческий ангелы своя, и соберут от Царствия его вся соблазны и творящих беззаконие

⁴²и ввергут их в пещь огненну: ту будет плачь и скрежет зубом:

⁴³тогда праведницы просветятся яко солнце в Царствии Отца их. Имеяй ушы слышати да слышит.

⁴⁴Паки подобно есть Царствие небесное сокровищу сокровену на селе, еже обрет человек скры, и от радости его идет, и вся, елика имать, продает, и купует село то.

⁴⁵Паки подобно есть Царствие небесное человеку купцу, ищущу добрых бисерей,

⁴⁶иже обрет един многоценен бисер, шед продаде вся, елика имяше, и купи его.

⁴⁷Паки подобно есть Царствие небесное неводу ввержену в море и от всякаго рода собравшу,

⁴⁸иже егда исполнися, извлекоша и на край, и седше избраша добрыя в сосуды, а злыя извергоша вон.

⁴⁹Тако будет в скончание века: изыдут ангели, и отлучат злыя от среды праведных,

⁵⁰и ввергут их в пещь огненную: ту будет плачь и скрежет зубом.

⁵¹глагола им Иисус: разуместе ли сия вся? Глаголаша ему: ей, Господи.

⁵²Он же рече им: сего ради всяк книжник, научився Царствию небесному, подобен есть человеку домовиту, иже износит от сокровища своего новая и ветхая.

⁵³И бысть, егда сконча Иисус притчи сия, прейде оттуду.

⁵⁴И пришед во отечествие свое, учаше их на сонмищи их, яко дивитися им и глаголати: откуду сему премудрость сия и силы?

⁵⁵не сей ли есть тектонов Сын? не Мати ли его нарицается Мариам, и братия его иаков и иосий, и симон и иуда?

⁵⁶и сестры его не вся ли в нас суть? откуду убо сему сия вся?

⁵⁷И блажняхуся о нем. Иисус же рече им: несть пророк без чести, токмо во отечествии своем и в дому своем.

⁵⁸И не сотвори ту сил многих за неверство их.