¹Mimi nitasimama mahali pa kuchungulia,

na kukaa juu mnarani;

nitakaa macho nione ataniambia nini,

atajibu nini kuhusu lalamiko langu.”

Mungu anamjibu Habakuki

²Kisha, Mwenyezi-Mungu akanijibu hivi:

“Yaandike maono haya;

yaandike wazi juu ya vibao,

anayepitia hapo apate kuyasoma.

³Maono haya yanangoja wakati wa kufaa;[#Taz Ebr 10:37]

ni maono ya ukweli juu ya mwisho.

Kama yaonekana kuchelewa, uyasubiri;

hakika yatafika, wala hayatachelewa.

⁴Andika:[#Taz Roma 1:17; Gal 3:11; Ebr 10:38]

‘Waangalie wenye kiburi, hao wataangamia;

lakini waadilifu wataishi kwa kumwamini Mungu.’”

Waovu wataangamia

⁵Zaidi ya hayo, divai hupotosha;

mtu mwenye kiburi hatadumu.

Yuko tayari kuwameza wengine kama Kuzimu;

kama vile kifo, hatosheki na kitu.

Hujikusanyia mataifa yote,

na watu wote kama mali yake.

⁶Kila mtu atamdhihaki mtu wa namna hiyo

na kumtungia misemo ya dhihaka:

“Ole wako unayejirundikia visivyo vyako,

na kuchukua rehani mali za watu lakini hulipi!

Utaendelea kufanya hivyo hadi lini?

⁷Siku moja wadeni wako watainuka ghafla,

wale wanaokutetemesha wataamka.

Ndipo utakuwa mateka wao.

⁸Wewe umeyapora mataifa mengi,

lakini wote wanaosalimika watakupora wewe,

kwa mauaji na dhuluma uliyoitendea dunia,

naam, uliyoifanyia miji na wakazi wake wote.

⁹“Ole wako unayejitajirisha kwa hasara ya mwingine,

ujengaye nyumba yako juu milimani

ukidhani kuwa salama mbali na madhara.

¹⁰Lakini kwa mipango yako umeiaibisha jamaa yako.

Kwa kuyaangamiza mataifa mengi,

umeyaangamiza maisha yako mwenyewe.

¹¹Ndiyo maana hata mawe yatalalamika ukutani,

na boriti za nyumba zitayaunga mkono.

¹²“Ole wako unayejenga mji kwa mauaji

unayesimika jiji kwa maovu!

¹³Mwenyezi-Mungu wa majeshi husababisha

juhudi za watu zipotelee motoni,

na mataifa yajishughulishe bure.

¹⁴Utukufu wa Mwenyezi-Mungu utaenea pote duniani,[#Taz Isa 11:9]

kama vile maji yaeneavyo baharini.

¹⁵Ole wako unayewalewesha jirani zako,

na kutia sumu katika divai yao

ili upate kuwaona wamekaa uchi.

¹⁶Utajaa aibu badala ya heshima.

Utakunywa wewe mwenyewe na kupepesuka!

Mwenyezi-Mungu mwenyewe atakulevya,

na aibu itaifunika heshima yako!

¹⁷Maovu uliyoitenda Lebanoni yatakuvamia wewe;

uliwaua wanyama, wanyama nao watakutisha.

Yote hayo yatakupata wewe,

kwa mauaji na dhuluma uliyoitendea dunia,

naam, uliyoifanyia miji na wakazi wake wote.

¹⁸“Chafaa nini kinyago alichotengeneza mtu?

Sanamu ni madini yaliyoyeyushwa,

ni kitu cha kueneza udanganyifu!

Mtengeneza sanamu hutumaini alichotengeneza mwenyewe,

kinyago ambacho hakiwezi hata kusema!

¹⁹Ole wake mtu aliambiaye gogo: ‘Amka!’

Au jiwe bubu ‘Inuka!’

Je, sanamu yaweza kumfundisha mtu?

Tazama imepakwa dhahabu na fedha,

lakini haina uhai wowote.”

²⁰Lakini Mwenyezi-Mungu yumo katika hekalu lake takatifu;

dunia yote na ikae kimya mbele yake.