Jibu la Yobu laendelea

¹“Tazama, hayo yote nimeyaona kwa macho yangu;

nimeyasikia kwa masikio yangu mwenyewe na kuelewa.

²Yote mnayoyajua, mimi pia nayajua.

Mimi si mtu duni kuliko nyinyi.

³Lakini ningependa kusema na Mungu mwenye nguvu,

natamani kujitetea mbele zake Mungu.

⁴Lakini nyinyi mnaupakaa uongo chokaa;

nyinyi nyote ni waganga wasiofaa kitu.

⁵Laiti mngekaa kimya kabisa,

ikafikiriwa kwamba mna hekima!

⁶Sikilizeni basi hoja yangu,

nisikilizeni ninapojitetea.

⁷Je, mnadhani mwamtumikia Mungu kwa kusema uongo?

Mnafikiri kusema kwa hila kunamfaa yeye?

⁸Je, mnajaribu kumpendelea Mungu?

Je, mtamtetea Mungu mahakamani?

⁹Je, akiwakagua nyinyi mtapona?

Au mnadhani mnaweza kumdanganya Mungu kama watu?

¹⁰Hakika yeye atawakemea

kama mkionesha upendeleo kwa siri.

¹¹Je, fahari yake haiwatishi?

Je, hampatwi na hofu juu yake?

¹²Misemo yenu ni methali za majivu,

hoja zenu ni ngome za udongo.

¹³“Nyamazeni, nami niongee.

Yanipate yatakayonipata.

¹⁴Niko tayari hata kuhatarisha

maisha yangu;

¹⁵Mungu aniue akitaka, sina la kupoteza,

hata hivyo nitautetea mwenendo wangu mbele yake.

¹⁶Kama nikifaulu hapo nitakuwa nimeshinda,

maana mtu mwovu hawezi kwenda mbele yake.

¹⁷Sikilizeni kwa makini maneno yangu,

maelezo yangu na yatue masikioni mwenu.

¹⁸Kesi yangu nimeiandaa vilivyo,

nina hakika mimi sina hatia.

¹⁹“Nani atakayeipinga hoja yangu?

Niko tayari kunyamaza na kufa.

²⁰Mungu wangu, nijalie tu haya mawili,

nami sitajificha mbali na wewe:

²¹Kwanza uniondolee mkono wako unaonipiga,

na usiniangamize kwa kitisho chako.

²²“Uanze kutoa hoja yako nami nikujibu.

Au mimi nianze, nawe unijibu.

²³Makosa na dhambi zangu ni ngapi?

Nijulishe hatia na dhambi yangu.

²⁴“Mbona unaugeuza uso wako mbali nami?

Kwa nini unanitendea kama adui yako?

²⁵Je, utalitisha jani linalopeperushwa,

au kuyakimbiza makapi?

²⁶Wewe umetoa mashtaka makali dhidi yangu,

na kunibebesha dhambi za ujana wangu.

²⁷Wanifunga minyororo miguuni,[#Taz Yobu 33:11]

wazichungulia hatua zangu zote,

na nyayo zangu umeziwekea kikomo.

²⁸Nami naishia kama mti uliooza,

mithili ya vazi lililoliwa na nondo.