Utenzi wa kumsifu Mungu

¹Njoni tumwimbie Mwenyezi-Mungu,

tumshangilie mwamba wa wokovu wetu!

²Twende mbele zake na shukrani;

tumshangilie kwa nyimbo za sifa.

³Maana Mwenyezi-Mungu, ni Mungu mkuu;

yeye ni Mfalme mkuu juu ya miungu yote.

⁴Vilindi vyote vya dunia vimo mikononi mwake,

vilele vya milima ni vyake.

⁵Bahari ni yake, ndiye aliyeifanya;

kwa mikono yake aliiumba nchi kavu.

⁶Njoni tusujudu na kumwabudu;

tumpigie magoti Mwenyezi-Mungu, Muumba wetu!

⁷Maana yeye ni Mungu wetu,[#Taz Ebr 3:15; 4:7]

nasi ni watu wa kundi lake,

ni kondoo wake anaowachunga.

Laiti leo mngesikiliza sauti yake:

⁸“Msiwe wakaidi kama kule Meriba,

kama walivyokuwa kule Masa jangwani,

⁹wazee wenu waliponijaribu na kunipima,

ingawa walikuwa wameona mambo niliyowatendea.

¹⁰Kwa miaka arubaini nilichukizwa nao,

nikasema: ‘Kweli, hawa ni watu waliopotoka!

Hawajali kabisa njia zangu!’

¹¹Basi, nilikasirika, nikaapa:[#Taz Ebr 4:3-5]

‘Hawataingia mahali pangu pa pumziko!’”