Adhabu kwa sababu ya kujiamini

¹Ole wenu nyinyi mnaostarehe huko Siyoni,

nanyi mnaojiona salama mlimani Samaria!

Nyinyi mwaonekana kuwa viongozi wa taifa maarufu

ambao Waisraeli wote huwategemea.

²Haya! Nendeni Kalne mkaangalie kila mahali,[#6:2 Aya hii inaweza kueleweka kama onyo la Amosi kwa viongozi wa Israeli, au kama maneno ya kujivuna ambayo Amosi anawawekea mdomoni mwao. “Kalne” na “Hamathi” ilikuwa miji maarufu ya Siria (Isa 10:9).]

tokeni huko mwende hadi mji ule mkubwa wa Hamathi,

kisha teremkeni hadi Gathi kwa Wafilisti.

Je, falme zao si bora kuliko zenu

na eneo lao si bora kuliko lenu?”

³Nyinyi mnajaribu kuifukuza siku mbaya.

Lakini mnauleta karibu utawala dhalimu.

⁴Ole wenu mnaolala juu ya vitanda vya pembe za ndovu

na kujinyosha juu ya masofa,

mkila nyama za wanakondoo na ndama!

⁵Nyinyi mnapenda kuimba ovyo na sauti ya vinubi

na kubuni ala mpya za muziki mkimwiga mfalme Daudi.

⁶Mnakunywa divai kwa mabakuli,

na kujipaka marashi mazuri mno.

Lakini hamhuzuniki hata kidogo

juu ya kuangamia kwa wazawa wa Yosefu.

⁷Kwa hiyo mtakuwa wa kwanza kwenda uhamishoni,[#6:7 Taz Amo 5:27.]

na karamu za wenye kustarehe zitatoweka.

⁸Bwana Mwenyezi-Mungu ameapa kwa nafsi yake;

Mwenyezi-Mungu, Mungu wa majeshi asema:

“Nachukizwa mno na kiburi cha wazawa wa Yakobo;

tena nayachukia majumba yao ya fahari.

Mji wao na vyote vilivyomo nitawapa adui zao.”

⁹Kama wakibaki watu kumi katika nyumba moja, wote watakufa.

¹⁰Na atakapokuja mjomba wa aliyekufa kuitoa maiti nje aichome, akamwuliza yeyote atakayekuwako ndani pembeni mwa nyumba, “Je kuna mtu mwingine pamoja nawe?” Naye atamjibu, “La! Hamna!” Naye atamwambia, “Nyamaza kimya! Tusilitaje hata jina la Mwenyezi-Mungu.”[#6:10 Maana ya aya hii katika Kiebrania si dhahiri. Lakini inaonekana kwamba wazo la kutokumtaja Mwenyezi-Mungu katika mazingira hayo ni kutaka kuepa madhara zaidi.]

¹¹Tazama! Mwenyezi-Mungu anatoa amri,

nalo jumba kubwa labomoka vipandevipande,

na nyumba ndogo kusagikasagika.

¹²Je, farasi waweza kupiga mbio miambani?

Je, watu huilima bahari kwa ng'ombe?

Lakini nyinyi mmeigeuza haki kuwa sumu,

na tunda la uadilifu kuwa uchungu.

¹³Nyinyi mnashangilia juu ya Lodebari,[#6:13 Matumizi ya jina hili katika Kiebrania ni kama neno lenye maana “kitu batili” au “upuuzi.”]

na kusema mmeuteka Karnaimu kwa nguvu zenu wenyewe.

¹⁴Mwenyezi-Mungu wa majeshi asema hivi:

“Enyi Waisraeli,

kweli nitaleta taifa moja lije kuwashambulia,

nalo litawatesa nyinyi kuanzia Lebo-hamathi kaskazini,

hadi kijito cha Araba, upande wa kusini.”