¹Kila kuhani mkuu ambaye huchaguliwa miongoni mwa watu hupewa jukumu la kushughulikia mambo ya Mungu kwa niaba ya watu, kutolea zawadi na tambiko kwa ajili ya dhambi.

²Maadamu yeye mwenyewe ni dhaifu, anaweza kuwatendea kwa huruma wale wasiojua kitu na wanaofanya makosa.

³Kwa sababu hiyo anapaswa kutoa tambiko si tu kwa ajili ya watu, bali pia kwa ajili ya dhambi zake mwenyewe.

⁴Hakuna mtu awezaye kujifanya mwenyewe kuwa kuhani mkuu. Kila mmoja huteuliwa na Mungu kuwa kuhani mkuu kama alivyokuwa Aroni.

⁵Hali kadhalika naye Kristo; yeye hakujitwalia mwenyewe heshima ya kuwa kuhani mkuu, bali Mungu alimteua na kumwambia:

“Wewe ni Mwanangu;

mimi leo nimekuwa baba yako.”

⁶Alisema pia mahali pengine:

“Wewe ni kuhani milele,

kwa utaratibu wa ukuhani wa Melkisedeki.”

⁷Yesu alipokuwa anaishi hapa duniani, kwa kilio kikuu na machozi, alisali na kumwomba Mungu ambaye alikuwa na uwezo wa kumwokoa kifoni; naye alisikilizwa kwa sababu ya kumcha Mungu.[#5:7 Yahusu mateso ya Yesu kule Gethsemane (taz Mat 26:36-46 na sehemu sambamba katika Injili nyingine).]

⁸Lakini, ingawa alikuwa Mwana wa Mungu, alijifunza kutii kwa njia ya mateso.[#5:7-8 Fil 2:8; rejea Mat 26:39 na sambamba zake.]

⁹Na alipofanywa mkamilifu, akawa chanzo cha wokovu wa milele kwa wote wanaomtii,

¹⁰naye Mungu akamteua kuwa kuhani mkuu kwa utaratibu wa ukuhani wa Melkisedeki.

Onyo kuhusu uasi

¹¹Tunayo mengi ya kusema juu ya jambo hili, lakini ni vigumu kuwaelezeni, kwa sababu nyinyi si wepesi wa kuelewa.[#5:11 Yaani kuhusu ukuhani wa Kristo na wadhifa wake.]

¹²Kwa wakati huu nyinyi mngalipaswa kuwa waalimu tayari, lakini mnahitaji bado mtu wa kuwafundisheni mafundisho ya mwanzo juu ya neno la Mungu. Mnahitaji maziwa badala ya chakula kigumu.[#5:12-13 Namna hii ya kusema juu ya kukomaa na kutokomaa katika maisha ya Kikristo tunaikuta pia katika 1Kor 3:1-2; rejea pia 1Pet 2:2.]

¹³Kila anayepaswa kunywa maziwa ni mtoto bado, hajui uadilifu ni nini.

¹⁴Lakini chakula kigumu ni kwa ajili ya watu waliokomaa, waliofunzwa kwa vitendo kubainisha mema na mabaya.