Yesu mwanga wa ulimwengu

¹²Yesu alipozungumza nao tena, aliwaambia, “Mimi ndimi mwanga wa ulimwengu. Anayenifuata mimi hatembei kamwe gizani, bali atakuwa na mwanga wa uhai.”[#8:12 Yesu anatetea ukweli wa ujumbe wake na kwamba amekuja ulimwenguni kusudi watu waone jinsi Mungu alivyo. Itakumbukwa pia kwamba katika Mat 5:14 wale wanafunzi wake pia wanasemwa kuwa ni mwanga wa ulimwengu. Taz pia Yoh 9:5.]

¹³Basi, Mafarisayo wakamwambia, “Wewe unajishuhudia mwenyewe; kwa hiyo ushahidi wako si halali.”

¹⁴Yesu akawajibu, “Hata kama ninajishuhudia mwenyewe, ushahidi wangu ni wa kweli kwa sababu mimi najua nilikotoka na ninakokwenda. Lakini nyinyi hamjui nilikotoka wala ninakokwenda.

¹⁵Nyinyi mnahukumu kwa fikira za kibinadamu, lakini mimi simhukumu mtu.

¹⁶Hata nikihukumu, hukumu yangu ni halali kwa sababu mimi siko peke yangu; Baba aliyenituma yuko pamoja nami.

¹⁷Imeandikwa katika sheria yenu ya kwamba ushahidi wa watu wawili ni halali.

¹⁸Mimi najishuhudia mwenyewe, naye Baba aliyenituma, ananishuhudia pia.”

¹⁹Hapo wakamwuliza, “Baba yako yuko wapi?” Yesu akawajibu, “Nyinyi hamnijui mimi wala hammjui Baba. Kama mngenijua mimi, mngemjua na Baba yangu pia.”

²⁰Yesu alisema maneno hayo kwenye chumba cha hazina alipokuwa anafundisha hekaluni. Wala hakuna mtu aliyemtia nguvuni, kwa sababu saa yake ilikuwa haijafika bado.[#8:20 Huenda mahali hapo palikuwa katika ukumbi wa wanawake, karibu na mahali palipokuwa na vijisanduku vya kuweka sadaka. Taz Luka 21:1.; #8:20 Taz 2:4 maelezo.]

Niendako nyinyi hamwezi kufika

²¹Yesu akawaambia tena, “Naenda zangu nanyi mtanitafuta, lakini mtakufa katika dhambi zenu. Niendako mimi, nyinyi hamwezi kufika.”[#8:21 Yaani watakufa wakiwa hawajaachana na dhambi zao au hawajasamehewa (taz pia aya ya 24; ling Kumb 6:23; 8:10).]

²²Basi, viongozi wa Wayahudi wakasema, “Je, atajiua? Mbona anasema: ‘Niendako nyinyi hamwezi kufika?’”

²³Yesu akawaambia, “Nyinyi mmetoka papa hapa chini, mimi nimetoka juu; nyinyi ni wa ulimwengu huu, mimi si wa ulimwengu huu.[#8:23 Yesu anadokezea kwa maneno hayo kwamba yeye ametoka kwa Mungu. Lakini pia matumizi ya “ulimwengu” ambako hao wanaompinga wametoka ni ya kimfano kuelezea eneo ambalo katika Maandiko Matakatifu ni eneo la wenye kumpinga Mungu (15:18-19; Gal 6:14).]

²⁴Ndiyo maana niliwaambieni mtakufa katika dhambi zenu. Kama msipoamini kwamba ‘Mimi Ndimi Niliye’, mtakufa katika dhambi zenu.”[#8:24 Maneno ambayo, kulingana na maana yake, karibu ni sawa na yale yaliyotumiwa katika Kut 3:14 pale Mungu alipojitambulisha kwa Mose na watu wa Israeli kama “Mimi Ndimi”. Katika sehemu hiyo ya Kut 3 Mwenyezi-Mungu (Kiebrania: “Yahweh”) ndiye aliye kweli au ndiye mwenye kusababisha kuweko. Yaani yewye ni chanzo cha chochote kilichopo. Katika Injili ya Yohane Yesu anatumia msemo huo kujiunga na dhana au mawazo hayo juu ya Mungu na kueleza yale ambayo Mungu alimwagiza ayatekeleze ulimwenguni.]

²⁵Nao wakamwuliza, “Wewe ni nani?” Yesu akawajibu, “Nimewaambieni tangu mwanzo![#8:25 Au: “Ya nini hata niongee nanyi?”]

²⁶Ninayo mengi ya kusema na kuhukumu juu yenu. Lakini yule aliyenituma ni kweli; nami nauambia ulimwengu mambo yale tu niliyoyasikia kutoka kwake.”

²⁷Hawakuelewa kwamba Yesu alikuwa akisema nao juu ya Baba.

²⁸Basi, Yesu akawaambia, “Mtakapokwisha mwinua Mwana wa Mtu, hapo ndipo mtakapojua kwamba ‘Mimi Ndimi Niliye’, na kwamba sifanyi chochote mimi mwenyewe, ila nasema tu yale Baba aliyonifundisha.[#8:28 Wazo linalogusiwa hapa ni lile la kifo cha Yesu msalabani (taz Yoh 3:14). Katika 3:14 Yesu anasema atainuliwa juu kama Mose alipoinua juu yule nyoka wa shaba kusudi waliotazama nyoka huyo waweze kuponywa, na kwa namna hiyo hiyo wale wanaomtazama Yesu katika hali yake ya kuinuliwa juu msalabani wataweza nao kuponywa.; #8:28 Taz 8:24 maelezo.]

²⁹Yule aliyenituma yuko pamoja nami; yeye hakuniacha peke yangu kwani nafanya daima yale yanayompendeza.”

³⁰Baada ya kusema hayo watu wengi walimwamini.

Ukweli utawapeni uhuru

³¹Basi, Yesu akawaambia wale Wayahudi waliomwamini, “Kama mkiyazingatia mafundisho yangu mtakuwa kweli wanafunzi wangu.

³²Mtaujua ukweli, nao ukweli utawapeni uhuru.”

³³Nao wakamjibu, “Sisi ni wazawa wa Abrahamu, na hatujapata kamwe kuwa watumwa wa mtu yeyote yule. Una maana gani unaposema: ‘Mtakuwa huru?’”

³⁴Yesu akawajibu, “Kweli nawaambieni, kila mtu anayetenda dhambi ni mtumwa wa dhambi.[#8:34 Baadhi ya hati za kale zina: Kila mtu atendaye dhambi ni mtumwa.]

³⁵Mtumwa hana makao ya kudumu nyumbani, lakini mwana anayo makao ya kudumu.

³⁶Mwana akiwapeni uhuru mtakuwa huru kweli.

³⁷Najua kwamba nyinyi ni wazawa wa Abrahamu. Hata hivyo, mnataka kuniua kwa sababu hamyakubali mafundisho yangu.

³⁸Mimi nasema yale aliyonionesha Baba, lakini nyinyi mwafanya yale aliyowaambieni baba yenu.”

³⁹Wao wakamjibu, “Sisi ni watoto wa Abrahamu!” Yesu akawaambia, “Kama nyinyi mngekuwa watoto wa Abrahamu, mngefanya kama alivyofanya Abrahamu.

⁴⁰Mimi nimewaambieni ukweli niliousikia kwa Mungu; hata hivyo, nyinyi mwataka kuniua. Abrahamu hakufanya hivyo!

⁴¹Nyinyi mnafanya mambo yaleyale aliyofanya baba yenu.” Wao wakamwambia, “Sisi si watoto haramu! Tunaye baba mmoja tu, yaani Mungu.”

⁴²Yesu akawaambia, “Kama Mungu angekuwa Baba yenu, mngenipenda mimi, maana mimi nilitoka kwa Mungu na sasa niko hapa. Sikuja kwa mamlaka yangu mwenyewe, ila yeye alinituma.

⁴³Kwa nini hamuelewi hayo ninayosema? Ni kwa kuwa hamuezi kuusikiliza ujumbe wangu.

⁴⁴Nyinyi ni watoto wa baba yenu Ibilisi na mnataka tu kutekeleza tamaa za baba yenu. Yeye alikuwa muuaji tangu mwanzo; hana msimamo katika ukweli, kwani ukweli haumo ndani yake. Kila asemapo uongo, husema kutokana na hali yake ya maumbile, maana yeye ni mwongo na baba wa uongo.[#8:44 Maneno haya ni upeo wa ubishi kati ya Yesu na hao waliotajwa katika aya ya 30. Ibilisi au Shetani ni kiongozi wa nguvu zote zinazopingana na Mungu. Yesu alikuja ulimwenguni kushinda nguvu hizo za Shetani au Ibilisi.]

⁴⁵Mimi nasema ukweli, na ndiyo maana nyinyi hamniamini.

⁴⁶Nani kati yenu awezaye kuthibitisha kuwa mimi nina dhambi? Ikiwa basi nasema ukweli, kwa nini hamniamini?

⁴⁷Aliye wa Mungu husikiliza maneno ya Mungu. Lakini nyinyi hamsikilizi kwa sababu nyinyi si watu wa Mungu.”

Yesu alikuwako kabla ya Abrahamu

⁴⁸Wayahudi wakamwambia, “Je, hatukusema kweli kwamba wewe ni Msamaria, na tena una pepo?”[#8:48 Walitumia msemo huo kwa kumdharau kwani Wayahudi na Wasamaria hawakushirikiana.]

⁴⁹Yesu akajibu, “Mimi sina pepo; mimi namheshimu Baba yangu, lakini nyinyi hamniheshimu.

⁵⁰Mimi sijitafutii utukufu wangu mwenyewe; yuko mmoja mwenye kuutafuta utukufu huo, naye ni hakimu.

⁵¹Kweli nawaambieni, anayeuzingatia ujumbe wangu hatakufa milele.”

⁵²Basi, Wayahudi wakasema, “Sasa tunajua kweli kwamba wewe una pepo! Abrahamu alikufa, na manabii pia walikufa, nawe wasema ati, ‘Anayeuzingatia ujumbe wangu hatakufa milele!’[#8:52 Hapa ni dhahiri watu hawakuelewa maana ya yale aliyosema Yesu kwamba hawatakufa kama wakimtii yeye. Walifikiri kwamba alikuwa anasema juu ya kuishi daima hapa duniani. Tazama 3:4 ambapo pana kutokuelewa kwa namna hiyo hiyo.]

⁵³Je, unajifanya mkuu kuliko baba yetu Abrahamu ambaye alikufa? Hata na manabii walikufa. Wewe unajifanya kuwa nani?”

⁵⁴Yesu akawajibu, “Nikijitukuza mwenyewe, utukufu wangu si kitu. Baba yangu ambaye nyinyi mwasema ni Baba yenu, ndiye anayenitukuza.

⁵⁵Nyinyi hamjapata kumjua, lakini mimi namjua. Na, nikisema simjui, nitakuwa mwongo kama nyinyi. Mimi namjua na ninashika neno lake.

⁵⁶Abrahamu, baba yenu, alishangilia aione siku yangu; naye aliiona, akafurahi.”

⁵⁷Basi, Wayahudi wakamwambia, “Wewe hujatimiza miaka hamsini bado, nawe umemwona Abrahamu?”[#8:57 Baadhi ya hati za kale zina: Abrahamu amekuona?]

⁵⁸Yesu akawaambia, “Kweli nawaambieni, kabla Abrahamu hajazaliwa, mimi niko.”[#8:58 Au: “Mimi ndimi” kama 8:24.]

⁵⁹Hapo wakaokota mawe ili wamtupie, lakini Yesu akajificha, akatoka hekaluni.