Agano na watu wa Gibeoni

¹Wafalme wote waliokuwa ng'ambo ya mto Yordani katika nchi ya milimani na kwenye tambarare na eneo lote la pwani ya bahari ya Mediteranea kuelekea Lebanoni, Wahiti, Waamori, Wakanaani, Waperizi, Wahivi na Wayebusi, waliposikia habari za Waisraeli,

²wakakusanyika pamoja kwa nia moja ili kupigana vita na Yoshua na Waisraeli.

³Lakini wakazi wa Gibeoni walipopata habari juu ya jinsi Yoshua alivyoitenda miji ya Yeriko na Ai,[#9:3 Mji uliokuwa yapata kilomita kumi kaskazini-magharibi ya Yerusalemu. Baada ya kusikia habari za Waisraeli watu wa Gibeoni wanajaribu kuwatega Waisraeli wafanye nao mkataba wa amani.]

⁴waliamua kutumia hila. Wakatayarisha vyakula, wakapakiza magunia yaliyochakaa juu ya punda wao, viriba vilivyochakaa na kushonwa;

⁵wakavaa viatu, nguo zilizochakaa na vyakula vyao vyote vilikuwa vikavu vilivyoota ukungu.

⁶Basi, wakamwendea Yoshua kambini Gilgali, wakamwambia yeye na Waisraeli, “Sisi tumetoka nchi ya mbali; tafadhali tunaomba mfanye agano nasi.”[#9:6 Itakumbukwa kwamba katika Kut 23:31-33; 34:11-16; Kumb 7:1-4; 20:10-18 Waisraeli waliambiwa kwamba waliweza kufanya mikataba ya amani na watu walioishi mbali na nchi yao lakini walikatazwa kufanya mikataba ya amani pamoja na watu waliokuwa karibu nao. Hicho ndicho kiini cha mtego wa hao Wagibeoni.]

⁷Lakini Waisraeli wakawajibu hao Wahivi, “Tunawezaje kufanya agano nanyi? Labda nyinyi mnaishi karibu nasi.”

⁸Nao wakamwambia Yoshua, “Sisi tu watumishi wako.” Naye Yoshua akawauliza, “Nyinyi ni akina nani, na mnatoka wapi?”

⁹Wakamjibu, “Sisi, watumishi wako, tumetoka nchi ya mbali na tumekuja kwa maana tumesikia sifa za jina la Mwenyezi-Mungu, Mungu wenu; tulipata habari za umaarufu wake na yote aliyoyafanya nchini Misri.

¹⁰Tumesikia yote aliyowatenda wafalme wawili wa Waamori waliokuwa ng'ambo ya mto Yordani, mfalme Sihoni wa Heshboni na mfalme Ogu wa Bashani aliyekaa huko Ashtarothi.

¹¹Ndipo wazee wetu na wananchi wote wa nchi yetu, wakatuambia, tuchukue posho ya safari, tuje kukutana nanyi na kuwaambia kwamba sisi ni watumishi wenu; tafadhali fanyeni agano nasi.

¹²Tazama mikate yetu ambayo ilikuwa bado moto tulipoichukua wakati tulipoondoka kwetu, lakini sasa imekauka na kuota ukungu.

¹³Viriba hivi tulivijaza maji vikiwa vipya, lakini sasa vimepasukapasuka. Hata mavazi na viatu vyetu vimechakaa, kwani safari ilikuwa ndefu sana.”

¹⁴Hivyo, Waisraeli wakachukua vyakula vyao, bila ya kumwuliza shauri Mwenyezi-Mungu.[#9:14-15 Kitendo hicho kinaeleweka kwa namna mbili: a) katika mikataba kula chakula pamoja ilikuwa sehemu ya hatua za kufanya mikataba (Mwa 21:22-31); b) inawezekana kwamba walionja chakula hicho kujua kweli kama kilikuwa cha muda mrefu na hivyo kujua kwamba Wagibeoni hao walikuwa wametoka mbali. Ufafanuzi wa (a) unapatana na mazingira ya hapa zaidi hasa kwa vile mwandishi anasema “bila kumwuliza Mwenyezi-Mungu”.]

¹⁵Yoshua akafanya nao mkataba wa amani; akafanya agano kwamba atawaruhusu kuishi. Viongozi wa jumuiya ya Israeli wakawaapia kutekeleza mapatano hayo.

¹⁶Siku tatu baada ya kufanya agano nao, Waisraeli wakagundua kwamba watu hao walikuwa jirani zao na waliishi miongoni mwao.

¹⁷Basi, Waisraeli wakafunga safari, baada ya siku ya tatu wakafika katika miji yao. Miji hiyo ilikuwa Gibeoni, Kefira, Beerothi na Kiriath-yearimu.[#9:17 Miji hiyo ilikuwa yapata kilomita 32 hadi 48 magaribiya kambi ya Waisreali kule Gilgali. Nayo miji ya Kefira, Berothi na Kiriath-yearimu ilikuwa kwenye nusu kipenyo cha kilomita 8.]

¹⁸Lakini Waisraeli hawakuwaua, maana viongozi wa jumuiya ya Israeli walikuwa wamewaapia kwa jina la Mwenyezi-Mungu, Mungu wa Israeli. Hivyo basi, jumuiya yote ikawanung'unikia viongozi wao.

¹⁹Lakini viongozi wa Waisraeli wakaiambia jumuiya ya watu wao, “Kwa vile tumewaapia kwa jina la Mwenyezi-Mungu, Mungu wa Israeli, sasa hatuwezi kuwadhuru.[#9:19-21 Wagibeoni hawakuumizwa na Waisraeli ingawa walikuwa wamewadanganya. Jambo hilo linaonesha kwamba agano likisha fanyika haliwezi kuvunjwa tena. Taz Mwa 27:23.]

²⁰Tutawaacha waishi, ili tusije tukaadhibiwa kwa sababu ya kiapo tulichokula.

²¹Waacheni waishi.” Hivyo Wagibeoni wakawa wanaitumikia jamii nzima ya Israeli, wakiwakatia kuni na kuwachotea maji, kama viongozi wa Waisraeli walivyosema.

²²Yoshua akawaita Wagibeoni na kuwauliza, “Kwa nini mlitudanganya kwamba mlitoka nchi ya mbali na hali nyinyi mnaishi miongoni mwetu?

²³Sasa, nyinyi mmelaaniwa na baadhi yenu daima mtakuwa watumwa wa kukata kuni na kuchota maji kwa ajili ya nyumba ya Mungu wangu.”

²⁴Wakamjibu Yoshua, “Tuliambiwa kwamba kwa hakika Mwenyezi-Mungu, Mungu wenu, alimwamuru mtumishi wake Mose awaangamize wakazi wote wa nchi hii na kuwapa nyinyi nchi hii iwe mali yenu. Kwa hivyo, tulihofia maisha yetu na ndipo tukafanya jambo hili.

²⁵Sasa sisi tumo mikononi mwako, ututendee kama unavyoona inafaa.”

²⁶Basi, alilowatendea ni kuwaokoa mikononi mwa Waisraeli ili wasiangamizwe; hivyo hawakuwaua.

²⁷Lakini kutoka siku hiyo, Yoshua aliwafanya hao kuwa wakata-kuni na wachota-maji kwa ajili ya jumuiya nzima ya Waisraeli na kwa ajili ya madhabahu ya Mwenyezi-Mungu, popote pale Mwenyezi-Mungu alipochagua mpaka hivi leo.[#9:27 Wagibeoni waliungama ujanja wao na Waisraeli walitaka kuwaangamiza ila Yoshua aliwahurumia na kuwafanya wawatumikie. Katika 2Sam 21:2 tunaambiwa kwamba naye Daudi aliwalinda wasiangamizwe.]