Kujaribiwa kwa Yesu

¹Kisha Roho alimwongoza Yesu mpaka jangwani ili ajaribiwe na Ibilisi.[#4:1 Au “ashawishiwe”. Kukaa kwa Yesu kule jangwani kwa siku arubaini bila kula na majaribu anayopata kunakumbusha mambo yaliyowasibu Waisraeli kule jangwani walipotoka Misri. Waisraeli walishindwa katika majaribu yale waliyopata, lakini Yesu anabaki imara na mwaminifu kwa jukumu alilopewa. Rejea Ebr 2:18; 4:15.; #4:1 (Kigiriki: “Diabolos”) ni mojawapo ya majina ya Shetani, na jina hilo lina maana ya “Mpinzani”.]

²Akafunga siku arubaini mchana na usiku, na mwishowe akaona njaa.[#4:2 Tarakimu “arubaini” inakumbusha hapa historia ya Mose na Waisraeli (Kut 24:18; 34:28; Hes 14:33-34; 32:13) na Elia (1Fal 19:8).]

³Basi, mshawishi akamjia, akamwambia, “Ikiwa wewe ni Mwana wa Mungu, amuru mawe haya yawe mikate.”[#4:3 Rejea Mat 27:40. Yesu alipobatizwa alitangazwa rasmi kuwa Mwana wa Mungu (Mat 3:17) jina la sifa ambalo linamtaja Masiha. Kulingana na mapokeo ya Kiyahudi, wakati Masiha atakapokuja miujiza ya wakati wa Mose itafanyika tena. Ama kweli Ibilisi anamshauri Yesu afanye muujiza unaofanana na ule wa mana kule jangwani (Kut 16; tazama pia Yoh 6:30-36) ila hapa kwa faida yake Yesu mwenyewe]

⁴Yesu akamjibu, “Imeandikwa:

‘Mtu haishi kwa mkate tu,

ila kwa kila neno asemalo Mungu.’”

⁵Kisha Ibilisi akamchukua mpaka Yerusalemu, mji mtakatifu, akamweka juu ya mnara wa hekalu,

⁶akamwambia, “Ikiwa wewe ni Mwana wa Mungu, jitupe chini; maana imeandikwa:

‘Mungu atawaamuru malaika wake kwa ajili yako;

watakuchukua mikononi mwao,

usije ukajikwaa kwenye jiwe.’”

⁷Yesu akamwambia, “Imeandikwa pia:

‘Usimjaribu Bwana, Mungu wako.’”

⁸Kisha Ibilisi akamchukua mpaka juu ya mlima mrefu, akamwonesha falme zote za ulimwengu na fahari zake,

⁹akamwambia, “Hivi vyote nitakupa kama ukipiga magoti na kuniabudu.”

¹⁰Hapo, Yesu akamwambia, “Nenda zako Shetani! Imeandikwa:[#4:10 Jina ambalo lina maana ya “Mshtaki” au hata “Mpinzani” na ambalo linatumiwa pia kumtaja Ibilisi.]

‘Utamwabudu Bwana Mungu wako

na kumtumikia yeye peke yake.’”

¹¹Basi, Ibilisi akamwacha, na malaika wakaja, wakamhudumia.

Yesu anaanza kazi Galilaya

¹²Yesu aliposikia kwamba Yohane ametiwa gerezani alikwenda Galilaya.[#4:12 Luka 3:19-20. Herode Antipa, mtawala wa Galilaya na Perea, ndiye aliyemtia Yohane gerezani. Taz Mat 14:3 na Marko 6:17-18.]

¹³Aliondoka Nazareti, akaenda Kafarnaumu, mji ulio kando ya bahari ya Genesareti, mpakani mwa wilaya za Zebuluni na Naftali, akakaa huko.[#4:13 Haya yalikuwa makabila mawili ya kale, kusini mwa Israeli. Wakati huo wakazi wake hawakuwa Wayahudi. Maeneo hayo ambayo wakati uliopita yaliathiriwa sana na vita sasa yatapata tena baraka za Mungu. Taz Mat 1:22.]

¹⁴Ndivyo lilivyotimia lile neno lililosemwa kwa njia ya nabii Isaya:

¹⁵“Nchi ya Zebuluni na nchi ya Naftali,

kuelekea baharini ng'ambo ya mto Yordani,

Galilaya, nchi ya watu wa mataifa!

¹⁶Watu waliokaa gizani

wameona mwanga mkubwa.

Nao walioishi katika nchi ya giza na kivuli cha kifo,

mwanga umewaangazia!”

¹⁷Tangu wakati huo Yesu alianza kuhubiri akisema, “Tubuni, maana ufalme wa mbinguni umekariia!”

Yesu anawaita wavuvi wanne

¹⁸Yesu alipokuwa anatembea kando ya ziwa Galilaya, aliwaona ndugu wawili wavuvi; Simoni (aitwaye Petro) na Andrea, ndugu yake; walikuwa wakivua samaki kwa nyavu ziwani.[#4:18 Anaitwa pia “Petro”; taz Mat 16:18.]

¹⁹Basi, akawaambia, “Nifuateni, nami nitawafanya nyinyi wavuvi wa watu.”[#4:19 Neno Yesu alilotumia mara kwa mara alipoita watu ili wawe wanafunzi wake. Taz pia 9:9; Marko 1:17; 2:14; Marko 1:20; Luka 5:1-11.]

²⁰Mara wakaziacha nyavu zao, wakamfuata.[#4:20 Siyo tu kuandamana naye na kusikiliza mafundisho yake, bali aghalabu kumtii, kumstahi na kushirikiana naye kikamilifu. Taz pia 9:9; Marko 1:18; 2:14; Luka 5:28.]

²¹Alipokwenda mbele kidogo, aliwaona ndugu wengine wawili: Yakobo na Yohane, wana wa Zebedayo. Hao walikuwa ndani ya mashua pamoja na baba yao Zebedayo, wakitengeneza nyavu zao. Basi, Yesu akawaita,

²²nao mara wakaiacha mashua pamoja na baba yao, wakamfuata.

Yesu anafundisha watu na kuponya wagonjwa

²³Yesu alikuwa anakwenda kila mahali wilayani Galilaya, akifundisha katika masunagogi na kuhubiri Habari Njema juu ya ufalme wa Mungu. Aliponya kila namna ya maradhi na magonjwa waliyokuwa nayo watu.[#4:23 Nyumba ambamo Wayahudi walikutana siku za Sabato kwa ibada na masomo au mafundisho ya Maandiko Matakatifu. Wakati wa kukutana huko kiongozi wa kikao aliweza kumwalika yeyote aliyekuwako kueleza au kufafanua Maandiko hayo Matakatifu (rejea Luka 4:16-21; Mate 13:14-15).]

²⁴Habari zake zikaenea pande zote za Siria. Wagonjwa wote wenye maradhi ya kila namna na wale waliosumbuliwa na kila namna ya taabu: waliopagawa na pepo, wenye kifafa na watu waliokuwa wamelemaa, walipelekwa kwake; naye akawaponya wote.

²⁵Makundi mengi ya watu kutoka Galilaya, Dekapoli, Yerusalemu, Yudea na ng'ambo ya mto Yordani, yalimfuata.[#4:25 Jina ambalo lilikuwa na maana ya “Miji kumi” tisa kati ya hiyo ilikuwa upande wa mashariki mwa Mto Yordani.]