Sala ya shukrani

¹Nakushukuru, ee Mwenyezi-Mungu, kwa moyo wangu wote,

naimba sifa zako mbele ya miungu.

²Ninasujudu kuelekea hekalu lako takatifu;[#138:2 Ishara inayoashiria kwamba Mwanazaburi yuko, kwa uchache sana, nje ya mji wa Yerusalemu lilipo hekalu.]

nalisifu jina lako,

kwa sababu ya fadhili zako na uaminifu wako;

kwa sababu umeweka jina lako na neno lako

juu ya kila kitu.

³Nilipokulilia, wewe ulinijibu;

umeniongezea nguvu zangu.

⁴Wafalme wote duniani watakusifu, ee Mwenyezi-Mungu,

kwa sababu wameyasikia maneno yako.

⁵Wataimba sifa za matendo yako, ee Mwenyezi-Mungu,

kwa maana utukufu wako ni mkuu.

⁶Ingawa wewe ee Mwenyezi-Mungu, uko juu ya wote,

unawaangalia kwa wema walio wanyonge;

nao wenye kiburi huwaona kutoka mbali.

⁷Hata nikikumbana na taabu, wewe wanilinda;

waunyosha mkono wako dhidi ya hasira ya maadui zangu wakali;

kwa nguvu yako kuu wanisalimisha.

⁸Ee Mwenyezi-Mungu, utatimiza yote uliyoniahidi.

Fadhili zako, ee Mwenyezi-Mungu, zadumu milele.

Usisahau kazi ya mkono wako mwenyewe.