Sala ya kuomba msaada

¹Usikie sala yangu, ee Mwenyezi-Mungu!

Ulitegee sikio ombi langu

maana wewe ni mwaminifu;

unijibu kwa sababu ya uadilifu wako.

²Usinitie hukumuni mimi mtumishi wako,

maana hakuna yeyote aliye mwadilifu mbele yako.

³Maadui zangu wamenifuatia;

wameniangusha chini kabisa

wameniketisha gizani kama mtu aliyekufa zamani.

⁴Nimevunjika moyo kabisa;

nimekufa ganzi kwa ajili ya woga.

⁵Nakumbuka siku zilizopita;

natafakari juu ya yote uliyotenda,

nawaza na kuwazua juu ya matendo yako.

⁶Nakunyoshea mikono yangu kuomba;

nina kiu yako kama nchi kavu isiyo na maji.

⁷Ee Mwenyezi-Mungu, unijibu haraka;

maana nimekata tamaa kabisa!

Usijifiche mbali nami,

nisije nikawa kama wale washukao kwa wafu.

⁸Asubuhi unioneshe fadhili zako,[#143:8 Wakati wa matumaini mapya baada ya usiku wa giza la kukata tamaa.]

maana nimekuwekea tumaini langu.

Unifundishe mwenendo wa kufuata,

maana nakuelekezea ombi la moyo wangu.

⁹Uniokoe, ee Mwenyezi-Mungu, kutoka maadui zangu,

maana kwako nakimbilia usalama.

¹⁰Unifundishe kutimiza matakwa yako,

maana wewe ni Mungu wangu!

Roho yako nzuri iniongoze katika njia sawa.

¹¹Unifadhili, ee Mwenyezi-Mungu, kwa hisani yako,

uniondoe katika taabu kwa sababu ya uadilifu wako.

¹²Kwa sababu ya fadhili zako uwakomeshe maadui zangu,

uwaangamize wote wanaonidhulumu;

maana mimi ni mtumishi wako.