¹Mimi Paulo, mtumishi wa Mungu na mtume wa Yesu Kristo naandika. Mimi nimechaguliwa kuijenga imani ya wateule wa Mungu na kuwaongoza waufahamu ukweli wa dini yetu[#1:1-4 Huu utangulizi, kama kawaida ya barua za nyakati hizo (taz Rom 1:1-7 maelezo, na Utangulizi kwa Barua za Agano Jipya), unaongezea hapa taarifa fulani kuhusu Mungu na uhai wa milele.]

²ambayo msingi wake ni tumaini la kupata uhai wa milele. Mungu ambaye hasemi uongo, alituahidia uhai huo kabla ya mwanzo wa nyakati,[#1:2 2Tim 2:13 ambapo inasemwa kuwa yeye ni mwaminifu daima. Neno la Kigiriki ambalo linatumika tu hapa katika Tito 1:2 linachukua pia maana ya “wa kuaminika”, na “wa kutegemewa”.]

³na wakati ufaao ulipowadia, akaudhihirisha katika ujumbe wake. Mimi nilikabidhiwa ujumbe huo niutangaze kufuatana na amri ya Mungu, Mwokozi wetu.[#1:3 1Tim 2:6 na pia 6:12; yaani yahusu wakati uliopangwa na Mungu. Huo wakati ni sawa na wakati wa kudhihirisha upendo wake (Rom 5:6-8).; #1:3 Mojawapo ya mafungu ya maneno yanayotumika mara nyingi katika barua hizi zijulikanazo kama za kichungaji (1Tim 1:1; 2:3; Tito 2:10; 3:4).]

⁴Ninakuandikia wewe Tito, mwanangu wa kweli katika imani tunayoshiriki. Nakutakia neema na amani kutoka kwa Mungu Baba, na kutoka kwa Kristo Yesu, Mkombozi wetu.[#1:4 Mwenzi na msaidizi wa Paulo katika kuhubiri Injili. Tito alikuwa Mgiriki (2Kor 7:6; 8:6,16-17,23; Gal 2:1,3; 2Tim 4:10). Kuhusu maneno: “mwanangu wa kweli katika imani”, tazama 1Tim 1:2 maelezo.]

Kazi ya Tito kule Krete

⁵Nilikuacha Krete ili urekebishe yale mambo ambayo hayakuwa yamekamilika bado, na kuwateua wazee wa kanisa katika kila mji. Kumbuka maagizo yangu:[#1:5 Kisiwa katika bahari ya Mediteranea Kusini Mashariki mwa Ugiriki.]

⁶mzee wa kanisa anapaswa kuwa mtu asiye na hatia; aliye na mke mmoja tu, na watoto wake wanapaswa kuwa waumini, wasiojulikana kuwa wakorofi au wakaidi.[#1:5-7 Jina la sifa linalomtaja “Kiongozi wa kanisa” (Kigiriki: “presbuteros”). Katika aya ya 7 neno “askofu” (Kigiriki: “episkopos”) linatumika kuhusu wadhifa huohuo wa mwenye madaraka juu ya jumuiya ya waumini au Kanisa (taz 1Tim 3:1 maelezo, na pia Mate 20:28 maelezo).; #1:6 Taz 1Tim 3:2.; #1:6-9 Rejea sifa zinazotakiwa kwa hao viongozi katika 1Tim 3:2-13.]

⁷Maana kwa vile kiongozi wa kanisa ni mkurugenzi wa kazi ya Mungu, anapaswa kuwa mtu asiye na hatia. Asiwe mwenye majivuno, mwepesi wa hasira, mlevi, mkorofi au mchoyo.

⁸Anapaswa kuwa mkarimu na anayependa mambo mema. Anapaswa kuwa mtu mtaratibu, mwadilifu, mtakatifu na mwenye nidhamu.[#1:8 Taz 1Tim 3:2 maelezo.]

⁹Ni lazima ashike kikamilifu ujumbe ule wa kuaminika kama unavyofundishwa. Ndivyo atakavyoweza kuwatia wengine moyo kwa mafundisho sahihi na kuyafichua makosa ya wale wanaoyapinga mafundisho hayo.[#1:9 Maneno yanayotumiwa mara nyingi katika hizi barua zinazojulikana kama za kichungaji; taz 1Tim 1:10 maelezo.]

¹⁰Maana, wako watu wengi, hasa wale walioongoka kutoka dini ya Kiyahudi, ambao ni wakaidi, na wanawapotosha wengine kwa upumbavu wao.

¹¹Lazima kukomesha maneno yao, kwani wanavuruga jumuiya nzima kwa kufundisha mambo ambayo hawapaswi kufundisha; wanafanya hivyo kwa nia mbaya ya kupata faida ya fedha.

¹²Hata mmoja wa manabii wao, ambaye naye pia ni Mkrete, alisema: “Wakrete husema uongo daima; ni kama wanyama wabaya, walafi na wavivu!”[#1:12 Nukuu kutoka kwa mwanamashairi mmoja wa Krete kwa jina Epimenide wa karne ya 6 K.K. Maneno yanayotajwa juu ya tabia ya Wakrete ni yaleyale matatu yaliyotajwa kuhusu waalimu wa uongo katika aya 10 na 11 zilizotangulia.]

¹³Naye alitoboa ukweli; na kwa sababu hiyo, unapaswa kuwakaripia vikali, ili wawe na imani kamilifu.

¹⁴Wasiendelee kushikilia hadithi tupu za Kiyahudi na maagizo ya kibinadamu yanayozuka kwa watu walioukataa ukweli.[#1:14 Taz 1Tim 1:4 maelezo; rejea 1Tim 1:6; 4:7; 2Tim 2:14.; #1:14 1Tim 6:5; 2Tim 3:8; 4:4. “Maagizo ya kibinadamu”: Kwa maelezo ya aya inayofuata, yaani aya ya 15, hayo maagizo ya kibinadamu yamkini yahusu wale ambao walikataza kuoa na kula vyakula fulanifulani (1Tim 4:3-5), vitu ambavyo ni safi kwa sababu vilikuwa vimepangwa na Mungu (Mat 15:11; Marko 7:18-19; Rom 14:14,20).]

¹⁵Kila kitu ni safi kwa watu walio safi; lakini hakuna chochote kilicho safi kwa wale waliochafuliwa na wasioamini, maana dhamiri na akili zao zimechafuliwa.[#1:15 Rejea Hag 2:10-14.]

¹⁶Watu kama hao hujidai kwamba wanamjua Mungu, lakini kwa matendo yao humkana. Ni watu wa kuchukiza mno na wakaidi, hawafai kwa jambo lolote jema.[#1:16 2Tim 3:5; rejea Mat 7:21; 1Yoh 1:6; 2:4.]