Malaika Rafaeli

¹Baada ya sherehe za harusi, Tobiti alimwita mwanawe Tobia, akamwambia, “Mwanangu, hakikisha kwamba unamlipa rafiki yako aliyesafiri nawe mshahara wake na kumwongezea kitu.”

²Tobia akamwuliza, “Baba, nitamlipa kiasi gani? Hata kama nikimpa nusu ya mali tuliyoleta pamoja singejali.

³Yeye amenifikisha nyumbani salama salimini; alimponya mke wangu, akaileta ile fedha pamoja nami, na sasa amekuponya wewe! Nitampa nini kwa hayo yote?”

⁴Tobiti akajibu, “Anastahili nusu ya yote aliyokusaidia kupata.”

⁵Basi, Tobia akamwita Rafaeli, akamwambia, “Chukua nusu ya mali yote uliyonisaidia kupata, kama mshahara wako. Nakutakia safari njema!”

⁶Lakini Rafaeli akawaita faraghani Tobiti na Tobia, akawaambia, “Mtukuzeni Mungu; tangazeni sifa zake kwa watu wote kwa ajili ya fadhili alizowafanyia. Mtukuzeni na kulisifu jina lake. Watangazieni watu wote matendo ya Mungu kama ipasavyo na wala msichoke kumshukuru.[#12:6 Simulizi hili ambalo msemaji wake mkuu ni yule malaika, linatokana na nia ya kitabu hiki ya kufundisha: Kuna mwito wa kumtegemea Mungu daima na kuishi maishi adili, kusaidia wahitaji au maskini. Tunakumbushwa kwamba Mungu huwatuza wote wale wanaotenda mema.]

⁷Yafaa kutunza siri ya mfalme, lakini matendo ya Mungu ni lazima yatangazwe kila mahali kama ipasavyo. Tendeni mema nanyi hamtapata madhara.

⁸“Afadhali sala pamoja na ukweli na kusaidia maskini pamoja na kutenda haki kuliko kuwa tajiri na kukosa uaminifu. Afadhali kusaidia maskini kuliko kulimbikiza dhahabu.[#12:8-9 Taz 4:9 maelezo.]

⁹Sadaka kwa maskini humwokoa mtu na kifo na kumtakasa dhambi zake zote. Wale wanaowasaidia maskini watajaliwa uhai,

¹⁰lakini wale wanaotenda dhambi na kufanya uovu hujiletea madhara wao wenyewe.

¹¹“Sasa nitawajulisheni ukweli wote bila kuwaficheni chochote. Nilikwisha waambia kwamba yafaa kuitunza siri ya mfalme, lakini matendo ya Mungu lazima yatangazwe kila mahali kama ipasavyo. Tobiti!

¹²Wewe na Sara mlipokuwa mnasali wakati ule, mimi ndiye niliyewasilisha sala zenu mbele ya Bwana aliye mtukufu. Na kila ulipokuwa unawazika wafu, mimi niliwasilisha matendo yako mbele yake.

¹³Wakati wewe hukusita hata kidogo kuinuka na kukiacha chakula ukaenda kumzika mtu aliyekufa, Mungu alinituma nikujaribu.

¹⁴Lakini pia alinituma kukuponya na kumwokoa mke wa mwanao, Sara.

¹⁵Mimi ni Rafaeli, mmoja wa wale malaika saba wanaokaa tayari daima mbele yake Bwana aliye mtukufu kumtumikia.”[#12:15 Rejea Ufu 8:2. Hapa wanawakilisha Mungu kama mtawala mkuu amezungukwa na wajaumbe wa mahakama yake (rejea Esta 1:14; Ezra 7:14). Makala nyingine zinasema kwa jumla zaidi juu ya “malaika wakuu” (Dan 10:13). Rejea pia Dan 9:21; Luka 1:19. Katika maandishi mengine ya Wayahudi nje ya Biblia kuna maelezo mengi ya namna nyingi za malaika waliopangiwa watu mbalimbali.]

¹⁶Tobiti na Tobia wakashikwa na hofu kubwa, wakasujudu wakiogopa sana.[#12:16 Hali hiyo ndiyo inayotokea kwa kawaida wakati Mungu au viumbe wa mbinguni wanapomtokea binadamu. Rejea Amu 6:22-23; 13:20-22; Ufu 1:17.]

¹⁷Lakini Rafaeli akawaambia, “Msiogope! Muwe na amani. Mtukuzeni Mungu milele.

¹⁸Mimi nilipokuwa kati yenu haikuwa kwa kutaka kwangu mwenyewe, bali kwa kutaka kwake Mungu. Yeye ndiye mnayepaswa kumtukuza maisha yenu yote. Yeye ndiye mnayepaswa kumsifu.

¹⁹Nyinyi mlidhani mliniona nikila chakula, lakini ni kwa kuonekana tu na haikuwa hivyo.[#12:19 Aya hii si dhahiri. Wazo kwamba malaika hawali chakula kama wanaadamu, ni jambo la mapokeo ya Kiyahudi.]

²⁰Basi, sasa mtukuzeni Bwana duniani na kumshukuru. Mimi narudi sasa kwake yeye aliyenituma kutoka juu. Andikeni mambo hayo yote yaliyotukia.”

²¹Kisha Rafaeli akatoweka, wasimwone tena.

²²Basi wakamsifu Mungu kwa nyimbo, wakamshukuru kwa ajili ya matendo yake makuu aliyowafanyia malaika wake Mungu alipokuwa amewatokea.