¹Naye Sauli alikua pale, akiridhia kuuawa kwa Stefano.

Waumini wateswa na kutawanyika

Siku ile kukatukia mateso makuu dhidi ya kanisa huko Yerusalemu, waumini wote isipokuwa mitume wakatawanyika, wakakimbilia Yudea na Samaria.

²Watu wacha Mungu wakamzika Stefano na kumwomboleza sana.

³Lakini Sauli alianza kuliangamiza kanisa. Aliingia nyumba kwa nyumba, akiwaburuta wanaume na wanawake, na kuwafunga gerezani.

Filipo ahubiri Injili huko Samaria

⁴Kwa hiyo wale waliotawanyika wakalihubiri neno la Mungu kila mahali walipoenda.

⁵Filipo akaenda mji mmoja wa Samaria akawahubiria habari za Kristo.[#8:5 maana yake Masiya , yaani Aliyetiwa mafuta.]

⁶Watu walipomsikia Filipo na kuona ishara na miujiza alizofanya, wakasikiliza kwa makini yale aliyosema.

⁷Pepo wachafu wakawa wakiwatoka watu wengi huku wakipiga kelele, na wengi waliopooza na viwete wakaponywa.

⁸Hivyo pakawa na furaha kuu katika mji huo.

Simoni mchawi

⁹Basi mtu mmoja jina lake Simoni alikuwa amefanya uchawi kwa muda mrefu katika mji huo akiwashangaza watu wote wa Samaria. Alijitapa kwamba yeye ni mtu mkuu,

¹⁰nao watu wote, wakubwa kwa wadogo, wakamsikiliza na kustaajabu, wakisema, “Mtu huyu ndiye ajulikanaye kama Uweza Mkuu wa Mungu.”

¹¹Wakamfuata kwa sababu kwa muda mrefu alikuwa amewashangaza kwa uchawi wake.

¹²Lakini watu walipomwamini Filipo akihubiri Habari Njema ya ufalme wa Mungu na jina la Yesu Kristo, wakabatizwa, wanaume na wanawake.

¹³Simoni naye akaamini na akabatizwa. Akamfuata Filipo kila mahali, akistaajabishwa na ishara kuu na miujiza aliyoiona.

¹⁴Basi mitume waliokuwa Yerusalemu waliposikia kuwa Samaria wamelipokea neno la Mungu, wakawatuma Petro na Yohana waende huko.

¹⁵Nao walipofika wakawaombea ili wampokee Roho Mtakatifu,

¹⁶kwa sababu Roho Mtakatifu alikuwa bado hajawashukia hata mmoja ila wamebatizwa tu katika jina la Bwana Yesu.

¹⁷Ndipo Petro na Yohana wakaweka mikono yao juu ya wale waliobatizwa, nao wakapokea Roho Mtakatifu.

¹⁸Simoni alipoona kuwa watu wanapokea Roho Mtakatifu mitume walipoweka mikono juu yao, akataka kuwapa fedha

¹⁹akisema, “Nipeni na mimi uwezo huu ili kila mtu nitakayeweka mikono yangu juu yake apate kupokea Roho Mtakatifu.”

²⁰Petro akamjibu, “Fedha yako na iangamie pamoja nawe, kwa sababu ulidhani unaweza kununua karama ya Mungu kwa fedha!

²¹Wewe huna sehemu wala fungu katika huduma hii kwa kuwa moyo wako si mnyofu mbele za Mungu.

²²Kwa hiyo tubu kwa uovu huu wako na umwombe Bwana. Yamkini aweza kukusamehe mawazo uliyo nayo moyoni mwako.

²³Kwa maana ninaona kwamba wewe umejawa na uchungu na ni mfungwa wa dhambi.”

²⁴Ndipo Simoni akajibu, “Niombeeni kwa Bwana, ili hayo mliyosema lolote lisinitokee.”

²⁵Nao walipokwisha kutoa ushuhuda na kuhubiri neno la Bwana, wakarudi Yerusalemu wakihubiri Injili katika vijiji vingi vya Samaria.

Filipo na towashi wa Kushi

²⁶Basi malaika wa Bwana akamwambia Filipo, “Nenda upande wa kusini kwenye ile barabara inayotoka Yerusalemu kuelekea Gaza ambayo ni jangwa.”

²⁷Hivyo akaondoka. Akiwa njiani akakutana na towashi wa Kushi, aliyekuwa afisa mkuu, mwenye mamlaka juu ya hazina zote za Kandake, Malkia wa Kushi. Huyu towashi alikuwa ameenda Yerusalemu ili kuabudu,

²⁸naye akiwa njiani kurudi nyumbani alikuwa ameketi kwenye gari lake la vita akisoma kitabu cha nabii Isaya.

²⁹Roho Mtakatifu akamwambia Filipo, “Nenda kwenye lile gari ukae karibu nalo.”

³⁰Ndipo Filipo akakimbilia lile gari na kumsikia yule mtu anasoma kitabu cha nabii Isaya. Filipo akamuuliza, “Je, unaelewa hayo unayoyasoma?”

³¹Yule towashi akasema, “Nitawezaje kuelewa mtu asiponifafanulia?” Hivyo akamkaribisha Filipo ili apande na kuketi pamoja naye.

³²Huyu towashi alikuwa anasoma fungu hili la Maandiko:

“Aliongozwa kama kondoo aendaye machinjoni,

kama mwana-kondoo anyamazavyo

mbele yake yule amkataye manyoya,

hivyo hakufungua kinywa chake.

³³Katika kufedheheshwa kwake alinyimwa haki yake.

Nani awezaye kueleza kuhusu kizazi chake?

Kwa maana maisha yake yaliondolewa

kutoka duniani.”

³⁴Yule towashi akamuuliza Filipo, “Tafadhali niambie, nabii huyu anena habari zake mwenyewe au habari za mtu mwingine?”

³⁵Ndipo Filipo akaanza kutumia fungu lile la Maandiko, akamweleza Habari Njema ya Yesu.

³⁶Walipokuwa wakiendelea na safari wakafika mahali palipokuwa na maji, yule towashi akamuuliza Filipo, “Tazama, hapa kuna maji. Kitu gani kitanizuia nisibatizwe?”

[

³⁷Filipo akamwambia, “Ukiamini kwa moyo wako wote, unaweza kubatizwa.”[#8:37 Maandiko mengine ya kale hayana aya hii.]

Akajibu, “Naamini kuwa Yesu Kristo ni Mwana wa Mungu.”]

³⁸Naye akaamuru lile gari lisimamishwe. Filipo na yule towashi wakateremka kwenye maji pamoja, naye Filipo akambatiza.

³⁹Nao walipotoka kwenye maji, ghafula Roho wa Bwana akamnyakua Filipo, naye towashi hakumwona tena, lakini akaenda zake akifurahi.

⁴⁰Filipo akajikuta Azoto; akasafiri akihubiri Injili katika miji yote hadi akafika Kaisaria.