Hajiri na Ishmaeli

¹Basi Sarai, mkewe Abramu, alikuwa hajamzalia watoto. Lakini alikuwa na mjakazi Mmisri jina lake Hajiri.

²Hivyo Sarai akamwambia Abramu, “Bwana amenizuilia kupata watoto. Basi nenda ukutane kimwili na mjakazi wangu; huenda nitaweza kupata watoto kupitia kwake.”

Abramu akakubaliana na lile Sarai alilosema.

³Hivyo baada ya Abramu kuishi katika nchi ya Kanaani miaka kumi, Sarai akamchukua mjakazi wake Mmisri aliyeitwa Hajiri, na kumpa mumewe awe mke wake.

⁴Abramu akakutana kimwili na Hajiri, naye akapata mimba.

Hajiri alipojua kuwa ana mimba, akaanza kumdharau Sarai.

⁵Ndipo Sarai akamwambia Abramu, “Unawajibika na mateso ninayoyapata. Nilimweka mtumishi wangu mkononi mwako. Sasa kwa vile anajua kwamba ana mimba, ananidharau mimi. Bwana na aamue kati yako na mimi!”

⁶Abramu akamwambia, “Haya, mtumishi wako yuko mkononi mwako. Mtendee lolote utakalo!” Ndipo Sarai akamtesa Hajiri, naye akamtoroka.

⁷Malaika wa Bwana akamkuta Hajiri karibu na chemchemi huko jangwani; chemchemi hiyo ilikuwa kando ya barabara iendayo Shuri.

⁸Malaika akamwambia, “Hajiri, mtumishi wa Sarai, umetoka wapi, na unaenda wapi?”

Akamjibu, “Ninamkimbia bibi yangu Sarai.”

⁹Ndipo malaika wa Bwana akamwambia, “Rudi kwa bibi yako ukajishushe chini yake.”

¹⁰Malaika akaendelea akasema, “Nitazidisha wazao wako, hivi kwamba watakuwa wengi mno wasiohesabika.”

¹¹Pia malaika wa Bwana akamwambia:

“Wewe sasa una mimba

nawe utamzaa mwana.

Utamwita jina lake Ishmaeli,

kwa sababu Bwana amesikia kuhusu huzuni yako.

¹²Atakuwa kama punda-mwitu kati ya wanadamu;

mkono wake utakuwa dhidi ya kila mtu,

na mkono wa kila mtu utakuwa dhidi yake,

naye ataishi kwa uhasama

na ndugu zake wote.”

¹³Hajiri akampa Bwana aliyezungumza naye jina hili: “Wewe ndiwe Mungu unionaye mimi,” kwa maana alisema, “Sasa nimemwona yeye anayeniona mimi.”

¹⁴Ndiyo sababu kisima kile kikaitwa Beer-Lahai-Roi; bado kipo hata leo kati ya Kadeshi na Beredi.[#16:14 maana yake Yeye Aliye Hai Anionaye]

¹⁵Hivyo Hajiri akamzalia Abramu mwana, naye Abramu akamwita huyo mwana Hajiri aliyemzalia jina la Ishmaeli.

¹⁶Abramu alikuwa na umri wa miaka themanini na sita Hajiri alipomzalia Ishmaeli.