Maombi ya Habakuki

²Bwana , nimezisikia sifa zako;

nami naogopa kwa matendo yako, Ee Bwana .

Fufua kazi yako katika siku hizi zetu,

tangaza habari yako wakati huu wetu;

katika ghadhabu kumbuka rehema.

³Mungu alitoka Temani,

yeye Aliye Mtakatifu kutoka Mlima Parani.

Utukufu wake ulifunika mbingu,

na sifa zake zikaifunika dunia.

⁴Mngʼao wake ulikuwa kama jua linapochomoza;

miali ilimulika kutoka mkononi mwake,

ambako nguvu zake zilifichwa.

⁵Tauni ilimtangulia;

maradhi ya kuambukiza yalifuata nyayo zake.

⁶Alisimama, akaitikisa dunia;

alitazama, na kuyafanya mataifa yatetemeke.

Milima ya zamani iligeuka mavumbi

na vilima vilivyozeeka vikaanguka.

Njia zake ni za milele.

⁷Niliona watu wa Kushani katika dhiki,

na makazi ya Midiani katika maumivu makali.

⁸Ee Bwana , uliikasirikia mito?

Je, ghadhabu yako ilikuwa dhidi ya vijito?

Je, ulighadhibikia bahari

ulipoendesha farasi wako

na magari yako ya vita ili ushinde?

⁹Uliufunua upinde wako

na kuitisha mishale mingi.

Uliigawa dunia kwa mito;

¹⁰milima ilikuona ikatetemeka.

Mafuriko ya maji yakapita huko;

vilindi vilinguruma

na kuinua mawimbi yake juu.

¹¹Jua na mwezi vilisimama kimya mbinguni

katika mngʼao wa mishale yako inayoruka,

na katika mngʼao wa mkuki wako umeremetao.

¹²Kwa ghadhabu ulipitia kwenye dunia,

na katika hasira ulikanyaga mataifa.

¹³Ulikuja kuwaokoa watu wako,

kumwokoa uliyempaka mafuta.

Ulimponda kiongozi wa nchi ya uovu,

ukamvua toka kichwani hadi wayo.

¹⁴Kwa mkuki wake mwenyewe ulitoboa kichwa chake

wakati mashujaa wake walifurika nje kwa kishindo kututawanya,

wakifurahi kama walio karibu kutafuna

wale wanyonge waliokuwa mafichoni.

¹⁵Ulikanyaga bahari kwa farasi wako,

ukisukasuka maji makuu.

¹⁶Nilisikia na moyo wangu ukagonga kwa nguvu,

midomo yangu ikatetemeka kwa hofu niliposikia sauti;

uchakavu ukanyemelea mifupa yangu,

na miguu yangu ikatetemeka.

Hata hivyo nitasubiri kwa uvumilivu siku ya maafa

kuyajilia mataifa yaliyotuvamia.

¹⁷Ingawa mtini hauchanui maua

na hakuna zabibu juu ya mizabibu,

ingawaje mzeituni hauzai,

na hata mashamba hayatoi chakula,

iwapo hakuna kondoo katika banda,

wala ngʼombe katika zizi,

¹⁸hata hivyo nitashangilia katika Bwana ,

nitamfurahia Mungu Mwokozi wangu.

¹⁹Bwana Mwenyezi ni nguvu yangu;

huifanya miguu yangu kama miguu ya ayala,

huniwezesha kupita juu ya vilima.