Ugonjwa wa Hezekia

¹Katika siku hizo Hezekia akaugua, naye akawa karibu kufa. Nabii Isaya mwana wa Amozi akaenda kwake na kumwambia, “Hili ndilo asemalo Bwana : Tengeneza mambo ya nyumba yako, kwa sababu utakufa, hutapona.”

²Hezekia akaelekeza uso wake ukutani, akamwomba Bwana :

³“Ee Bwana , kumbuka jinsi nilivyoenenda mbele zako kwa uaminifu na kujitoa kwa moyo wangu wote, na kufanya yaliyo mema machoni pako.” Naye Hezekia akalia kwa uchungu.

⁴Ndipo neno la Bwana likamjia Isaya, kusema:

⁵“Nenda ukamwambie Hezekia, ‘Hili ndilo asemalo Bwana , Mungu wa baba yako Daudi: Nimeyasikia maombi yako na nimeona machozi yako. Nitakuongezea miaka kumi na tano katika maisha yako.

⁶Nami nitakuokoa wewe pamoja na mji huu kutoka mkononi mwa mfalme wa Ashuru. Nitaulinda mji huu.

⁷“ ‘Hii ndiyo ishara ya Bwana kwako kwamba Bwana atafanya kile alichoahidi:

⁸Nitafanya kivuli cha jua kwenye ngazi iliyojengwa na Ahazi kirudi nyuma madaraja kumi.’ ” Hivyo jua likarudi nyuma madaraja kumi ambayo lilikuwa limeshuka.

⁹Maandiko ya Hezekia mfalme wa Yuda baada ya kuugua kwake na kupona:

¹⁰Nilisema, “Katika ustawi wa maisha yangu,

je, ni lazima nipite katika malango ya mauti,

na kupokonywa miaka yangu iliyobaki?”

¹¹Nilisema, “Sitamwona tena Bwana ,

Bwana katika nchi ya walio hai,

wala sitamtazama tena mwanadamu,

wala kuwa na wale ambao sasa wanakaa katika ulimwengu huu.

¹²Kama hema la mchunga mifugo,

nyumba yangu imebomolewa na kutwaliwa kutoka kwangu.

Kama mfumaji nimevingirisha maisha yangu,

naye amenikatilia mbali kutoka kitanda cha mfumi.

Mchana na usiku uliyakomesha maisha yangu.

¹³Nilingoja kwa uvumilivu hadi mapambazuko,

lakini alivunja mifupa yangu yote kama simba.

Mchana na usiku uliyakomesha maisha yangu.

¹⁴Nililia kama mbayuwayu au korongo,

niliomboleza kama hua aombolezaye.

Macho yangu yalififia nilipotazama mbinguni.

Ee Bwana, ninataabika, njoo unisaidie!”

¹⁵Lakini niseme nini?

Amesema nami, naye yeye mwenyewe amelitenda hili.

Nitatembea kwa unyenyekevu

katika miaka yangu yote

kwa sababu ya haya maumivu makali

ya nafsi yangu.

¹⁶Bwana, kwa mambo kama haya watu huishi,

nayo roho yangu hupata uzima katika hayo pia.

Uliniponya

na kuniacha niishi.

¹⁷Hakika ilikuwa ya faida yangu

ndiyo maana nikapata maumivu makali.

Katika upendo wako ukaniokoa

kutoka shimo la uharibifu;

umeziweka dhambi zangu zote

nyuma yako.

¹⁸Kwa maana kaburi haliwezi kukusifu,[#38:18 Kaburi hapa maana yake ni Kuzimu ; kwa Kiebrania ni Sheol.]

mauti haiwezi kuimba sifa zako;

wale wanaoshuka shimoni

hawawezi kuutarajia uaminifu wako.

¹⁹Walio hai, walio hai: hao wanakusifu,

kama ninavyofanya leo.

Baba huwaambia watoto wao

habari za uaminifu wako.

²⁰Bwana ataniokoa,

nasi tutaimba kwa vyombo vya nyuzi

siku zote za maisha yetu

katika Hekalu la Bwana .

²¹Isaya alikuwa amesema, “Tengenezeni dawa ya kubandika ya tini, mweke juu ya jipu, naye atapona.”

²²Hezekia alikuwa ameuliza, “Kutakuwa na ishara gani kwamba nitapanda kwenda Hekalu la Bwana ?”