Yesu amponya mtu aliyepooza mkono

¹Yesu akaingia tena ndani ya sinagogi, na kulikuwa na mtu aliyepooza mkono.

²Wakawa wanamwangalia waone kama atamponya huyo mtu siku ya Sabato, ili wapate sababu ya kumshtaki.

³Yesu akamwambia yule mtu mwenye mkono uliopooza, “Njoo hapa mbele ya watu wote.”

⁴Kisha Yesu akawauliza, “Je, ni lipi lililo halali siku ya Sabato: Ni kutenda mema au kutenda mabaya? Ni kuokoa maisha au kuua?” Lakini wao wakanyamaza.

⁵Yesu akawatazama kwa hasira watu waliomzunguka pande zote, akahuzunika sana kwa sababu ya ugumu wa mioyo yao. Akamwambia yule mtu mwenye mkono uliopooza, “Nyoosha mkono wako.” Akaunyoosha, nao ukawa umeponywa kabisa!

⁶Kisha Mafarisayo wakatoka nje, nao wakaanza kufanya njama ya kumuua Yesu wakishirikiana na Maherode.

Makundi ya watu wamfuata Yesu

⁷Yesu na wanafunzi wake wakaondoka huko, wakaenda baharini, nao umati mkubwa wa watu kutoka Galilaya wakamfuata.

⁸Waliposikia mambo yote aliyokuwa akiyafanya, makundi ya watu wakamjia kutoka Yudea, Yerusalemu, Idumaya, na ngʼambo ya Yordani, pamoja na wale wa maeneo ya Tiro na Sidoni.

⁹Kwa sababu ya umati mkubwa wa watu, aliwaambia wanafunzi wake watayarishe mashua ndogo kwa ajili yake, ili kuwazuia watu kumsonga.

¹⁰Kwa kuwa alikuwa amewaponya wagonjwa wengi, wale wenye magonjwa walikuwa wanasukumana ili wapate kumgusa.

¹¹Kila mara pepo wachafu walipomwona, walianguka chini mbele yake na kupiga kelele wakisema, “Wewe ndiwe Mwana wa Mungu.”

¹²Lakini aliwaonya wasiwaambie wengine kumhusu.

Yesu achagua mitume kumi na wawili

¹³Yesu akapanda mlimani na kuwaita wale aliowataka, nao wakamjia.

¹⁴Akawachagua watu kumi na wawili ambao aliwaita mitume, ili wapate kuwa naye, na awatume kwenda kuhubiri

¹⁵na kuwa na mamlaka ya kutoa pepo wachafu.

Simoni (ambaye alimwita Petro);

¹⁷Yakobo mwana wa Zebedayo, na Yohana nduguye (ambao aliwaita Boanerge, maana yake Wana wa Ngurumo);

¹⁸Andrea,

Filipo,

Bartholomayo,

Mathayo,

Tomaso,

Yakobo mwana wa Alfayo,

Thadayo,

Simoni Mkananayo,

¹⁹na Yuda Iskariote aliyemsaliti Yesu.

Yesu na Beelzebuli

²⁰Kisha Yesu alipoingia ndani ya nyumba, umati wa watu wakakusanyika tena, kiasi kwamba yeye na wanafunzi wake hawakuweza kula chakula.

²¹Ndugu zake walipopata habari wakaja ili kumchukua kwa maana watu walikuwa wakisema, “Amerukwa na akili.”

²²Walimu wa sheria walioteremka kutoka Yerusalemu walisema, “Amepagawa na Beelzebuli! Anatoa pepo wachafu kwa nguvu ya mkuu wa pepo wachafu!”[#3:22 kwa Kiyunani ni Beelzebubu , yaani mkuu wa pepo wachafu]

²³Basi Yesu akawaita na kuzungumza nao kwa mifano akasema: “Shetani awezaje kumtoa Shetani?

²⁴Kama ufalme ukigawanyika dhidi yake wenyewe, ufalme huo hauwezi kusimama.

²⁵Nayo nyumba ikigawanyika dhidi yake yenyewe, nyumba hiyo haiwezi kusimama.

²⁶Na kama Shetani akijipinga mwenyewe na awe amegawanyika, hawezi kusimama, bali mwisho wake umetimia.

²⁷Hakuna mtu yeyote awezaye kuingia kwenye nyumba ya mtu mwenye nguvu na kuteka nyara mali yake asipomfunga kwanza yule mwenye nguvu. Ndipo ataweza kuteka nyara mali yake.

²⁸Amin, nawaambia, watu wataweza kusamehewa dhambi na kufuru zao zote;

²⁹lakini yeyote anayemkufuru Roho Mtakatifu hatasamehewa kamwe, atakuwa na hatia ya dhambi ya milele.”

³⁰Yesu alisema hivi kwa sababu walikuwa wanasema, “Ana pepo mchafu.”

Mama yake na ndugu zake Yesu

³¹Kisha wakaja ndugu zake Yesu pamoja na mama yake. Wakiwa wamesimama nje, wakamtuma mtu kumwita.

³²Umati wa watu walikuwa wameketi kumzunguka, nao wakamwambia, “Mama yako na ndugu zako wako nje, wanakutafuta.”

³³Akawauliza, “Mama yangu na ndugu zangu ni nani?”

³⁴Kisha akawatazama wale watu waliokuwa wameketi kumzunguka pande zote, akasema, “Hawa ndio mama yangu na ndugu zangu.

³⁵Mtu yeyote anayetenda mapenzi ya Mungu, huyo ndiye kaka yangu, na dada yangu, na mama yangu.”