Zaburi 109

Lalamiko la mtu aliye kwenye shida

¹Ee Mungu, ninayekusifu,

usiwe kimya,

²kwa maana watu waovu na wadanganyifu

wamefungua vinywa vyao dhidi yangu;

wasema dhidi yangu

kwa ndimi za udanganyifu.

³Wamenizunguka kwa maneno ya chuki,

wananishambulia bila sababu.

⁴Wanachonilipa badala ya urafiki wangu ni kunishtaki,

lakini mimi ninawaombea.

⁵Wananilipiza mabaya kwa mema,

chuki badala ya urafiki wangu.

⁶Agiza mtu mwovu ampinge,

mshtaki asimame mkono wake wa kuume.

⁷Anapohukumiwa, apatikane na hatia,

nayo maombi yake yamhukumu.

⁸Siku zake za kuishi na ziwe chache,

nafasi yake ya uongozi ichukuliwe na mtu mwingine.

⁹Watoto wake na waachwe yatima,

mke wake na awe mjane.

¹⁰Watoto wake na watangetange wakiomba,

na wafukuzwe kwenye magofu ya nyumba zao.

¹¹Mtu anayemdai na ateke vyote alivyo navyo,

matunda ya kazi yake yatekwe nyara na wageni.

¹²Asiwepo mtu yeyote wa kumtendea mema

wala wa kuwahurumia yatima wake.

¹³Uzao wake na ukatiliwe mbali,

majina yao yafutike katika kizazi kifuatacho.

¹⁴Maovu ya baba zake na yakumbukwe

mbele za Mwenyezi Mungu,

dhambi ya mama yake

isifutwe kamwe.

¹⁵Dhambi zao na zibaki daima mbele za Mwenyezi Mungu,

ili apate kukatilia mbali kumbukumbu lao duniani.

¹⁶Kwa maana kamwe hakuweza kutenda wema,

bali alimfukuza mnyonge na mhitaji,

aliwafanyia jeuri wahitaji na waliovunjika moyo.

¹⁷Alipenda kulaani,

nayo laana ikampata;

hakupenda kubariki,

kwa hiyo baraka na ikae mbali naye.

¹⁸Alivaa kulaani kama vazi lake,

nayo laana ikamwingia mwilini mwake kama maji,

kwenye mifupa yake kama mafuta.

¹⁹Na iwe kama joho alilozungushiwa,

kama mshipi aliofungiwa daima.

²⁰Haya na yawe malipo ya Mwenyezi Mungu kwa washtaki wangu,

kwa wale wanaoninenea mabaya.

²¹Lakini wewe, Ee Bwana Mungu Mwenyezi,

unitendee wema kwa ajili ya jina lako,

uniokoe kwa wema wa pendo lako.

²²Maana mimi ni maskini na mhitaji,

moyo wangu umejeruhiwa ndani yangu.

²³Ninafifia kama kivuli cha jioni,

nimerushwa-rushwa kama nzige.

²⁴Magoti yangu yamelegea kwa kufunga,

mwili wangu umedhoofika na kukonda.

²⁵Nimekuwa kitu cha kudharauliwa kwa washtaki wangu,

wanionapo, hutikisa vichwa vyao.

²⁶Ee Mwenyezi Mungu, Mungu wangu, nisaidie,

niokoe sawasawa na upendo wako.

²⁷Watu na wafahamu kuwa ni mkono wako,

kwamba wewe, Ee Mwenyezi Mungu, umetenda hili.

²⁸Wanaweza kulaani, lakini wewe utabariki,

watakaposhambulia wataaibishwa,

lakini mtumishi wako atashangilia.

²⁹Washtaki wangu watavikwa fedheha,

na kufunikwa na aibu kama joho.

³⁰Kwa kinywa changu nitamtukuza sana Mwenyezi Mungu,

katika umati mkubwa nitamsifu.

³¹Kwa maana husimama mkono wa kuume wa mhitaji,

kuokoa maisha yake kutoka kwa wale wanaomhukumu.