Zaburi 11

Kumtumaini Bwana

¹Kwa Bwana ninakimbilia.

Unawezaje basi kuniambia:

“Ruka kama ndege utorokee kwenye mlima wako.

²Hebu tazama, waovu wanapinda nyuta zao;

wanaweka mishale kwenye nyuzi zake

ili wakiwa gizani, wawapige

walio wanyofu wa moyo.

³Wakati misingi imeharibiwa,

mwenye haki anaweza kufanya nini?”

⁴Bwana yuko ndani ya Hekalu lake takatifu;

Bwana yuko kwenye kiti chake cha enzi mbinguni.

Huwaangalia wana wa watu,

macho yake yanawachunguza.

⁵Bwana huwachunguza wenye haki,

lakini nafsi yake inachukia waovu

na wale wanaopenda mapigano.

⁶Atawanyeshea waovu makaa ya moto mkali

na kiberiti kinachowaka;

upepo wenye joto kali ndio fungu lao.

⁷Kwa kuwa Bwana ni mwenye haki,

yeye hupenda haki.

Wanyofu watauona uso wake.