Zaburi 114

Maajabu ya Mwenyezi Mungu wakati Israeli walitoka Misri

¹Israeli alipotoka Misri,

nyumba ya Yakobo kutoka kwa watu wa lugha ngeni,

²Yuda alifanywa makao matakatifu ya Mungu,

Israeli akawa milki yake.

³Bahari ilitazama ikakimbia,

Yordani ulirudi nyuma,

⁴milima ilirukaruka kama kondoo dume,

vilima kama wana-kondoo.

⁵Ee bahari, ni nini kilichokufanya ukakimbia,

nawe, ee Yordani, ukarudi nyuma,

⁶enyi milima mkarukaruka kama kondoo dume,

enyi vilima, kama wana-kondoo?

⁷Ee dunia, tetemeka mbele za Bwana,

mbele za Mungu wa Yakobo,

⁸aliyegeuza mwamba kuwa dimbwi la maji,

mwamba mgumu kuwa chemchemi za maji.