Zaburi 116

Shukrani kwa kuokolewa kutoka mauti

¹Nampenda Mwenyezi Mungu kwa maana amesikia sauti yangu;

amesikia kilio changu ili anihurumie.

²Kwa sababu amenitegea sikio lake,

nitamwita siku zote za maisha yangu.

³Kamba za mauti zilinizunguka,

vitisho vya Kuzimu vilinipata,

nikalemewa na taabu na huzuni.

⁴Ndipo nikaliitia jina la Mwenyezi Mungu:

“Ee Mwenyezi Mungu, niokoe!”

⁵Mwenyezi Mungu ni mwenye neema na haki,

Mungu wetu ni mwingi wa huruma.

⁶Mwenyezi Mungu huwalinda wanyenyekevu,

nilipokuwa katika shida kubwa, aliniokoa.

⁷Ee nafsi yangu, tulia tena,

kwa kuwa Mwenyezi Mungu amekuwa mwema kwako.

⁸Kwa kuwa wewe, Ee Mwenyezi Mungu,

umeniokoa nafsi yangu na mauti,

macho yangu kutokana na machozi,

miguu yangu kutokana na kujikwaa,

⁹ili niweze kutembea mbele za Mwenyezi Mungu,

katika nchi ya walio hai.

¹⁰Nilimwamini Mwenyezi Mungu, niliposema,

“Mimi nimeteseka sana.”

¹¹Katika taabu yangu nilisema,

“Wanadamu wote ni waongo.”

¹²Nimrudishie Mwenyezi Mungu nini

kwa wema wake wote alionitendea?

¹³Nitakiinua kikombe cha wokovu

na kulitangaza jina la Mwenyezi Mungu.

¹⁴Nitazitimiza nadhiri zangu kwa Mwenyezi Mungu

mbele za watu wake wote.

¹⁵Kifo cha watakatifu kina thamani

machoni pa Mwenyezi Mungu.

¹⁶Ee Mwenyezi Mungu, hakika mimi ni mtumishi wako,

mimi ni mtumishi wako,

mwana wa mjakazi wako;

umeniweka huru

toka katika minyororo yangu.

¹⁷Nitakutolea dhabihu ya kukushukuru

na kuliita jina la Mwenyezi Mungu.

¹⁸Nitazitimiza nadhiri zangu kwa Mwenyezi Mungu

mbele za watu wake wote,

¹⁹katika nyua za nyumba ya Mwenyezi Mungu,

katikati yako, ee Yerusalemu.

Msifuni Mwenyezi Mungu.