Zaburi 150

Msifuni Mwenyezi Mungu kwa ukuu wake

¹Msifuni Mwenyezi Mungu.[#150:1 kwa Kiebrania ni Hallelu Yah ; pia 150:6.]

Msifuni Mungu katika patakatifu pake,

msifuni katika mbingu zake kuu.

²Msifuni kwa matendo yake makuu,

msifuni kwa kadiri ya wingi wa ukuu wake.

³Msifuni kwa mvumo wa tarumbeta,

msifuni kwa kinubi na zeze,

⁴msifuni kwa matari na kucheza,

msifuni kwa kinanda cha nyuzi na filimbi,

⁵msifuni kwa matoazi yaliayo,

msifuni kwa matoazi yavumayo sana.

⁶Kila chenye pumzi na kimsifu Mwenyezi Mungu.

Msifuni Mwenyezi Mungu!