Zaburi 2

Mfalme aliyechaguliwa na Mungu

¹Kwa nini mataifa wanashauriana kufanya mabaya,

na makabila ya watu kula njama bure?

²Wafalme wa dunia wanajipanga

na watawala wanajikusanya

dhidi ya Bwana

na dhidi ya Mpakwa Mafuta wake.

³Wanasema, “Tuvunje minyororo yao

na kuvitupilia mbali vifungo vyao.”

⁴Yeye anayetawala mbinguni hucheka,

Bwana huwadharau.

⁵Kisha huwakemea katika hasira yake

na kuwaogopesha katika ghadhabu yake, akisema,

⁶“Nimemtawaza Mfalme wangu

juu ya Sayuni,

mlima wangu mtakatifu.”

Ushindi wa mfalme

⁷Nitatangaza amri ya Bwana :

Yeye aliniambia, “Wewe ni Mwanangu;

leo mimi nimekuwa Baba yako.

⁸Niombe, nami nitayafanya mataifa

kuwa urithi wako,

na miisho ya dunia kuwa milki yako.

⁹Utawapondaponda kwa fimbo ya chuma,

na kuwavunjavunja kama chombo cha mfinyanzi.”

¹⁰Kwa hiyo, ninyi wafalme, kuweni na hekima;

mwonyeke, enyi watawala wa dunia.

¹¹Mtumikieni Bwana kwa hofu

na mshangilie kwa kutetemeka.

¹²Mbusu Mwana, asije akakasirika

nawe ukaangamizwa katika njia yako,

kwa maana hasira yake inaweza kuwaka ghafula.

Heri wote wanaomkimbilia.