Zaburi 38

Maombi ya mtu anayeteseka

¹Ee Bwana , usinikemee katika hasira yako,

wala kuniadhibu katika ghadhabu yako.

²Kwa kuwa mishale yako imenichoma,

na mkono wako umenipiga.

³Hakuna afya mwilini mwangu

kwa sababu ya ghadhabu yako,

mifupa yangu haina uzima

kwa sababu ya dhambi zangu.

⁴Maovu yangu yamenifunika

kama mzigo mzito mno.

⁵Majeraha yangu yameoza na yananuka,

kwa sababu ya upumbavu wa dhambi zangu.

⁶Nimeinamishwa chini na kushushwa sana,

mchana kutwa nazunguka nikiomboleza.

⁷Viuno vyangu vimejaa maumivu yaunguzayo,

hakuna afya mwilini mwangu.

⁸Nimedhoofika na kupondwa kabisa,

nasononeka kwa maumivu makuu ya moyoni.

⁹Ee Bwana, yote ninayoyaonea shauku

yako wazi mbele zako,

kutamani kwangu sana

hakufichiki mbele zako.

¹⁰Moyo wangu unapigapiga,

nguvu zangu zimeniishia;

hata macho yangu yametiwa giza.

¹¹Rafiki na wenzangu wananikwepa

kwa sababu ya majeraha yangu;

majirani wangu wanakaa mbali nami.

¹²Wale wanaotafuta uhai wangu

wanatega mitego yao,

wale ambao wangetaka kunidhuru

huongea kuhusu maangamizi yangu;

hupanga hila mchana kutwa.

¹³Mimi ni kama kiziwi, asiyeweza kusikia,

ni kama bubu, asiyeweza kufungua kinywa chake;

¹⁴nimekuwa kama mtu asiyesikia,

ambaye kinywa chake hakiwezi kutoa jibu.

¹⁵Ee Bwana , ninakungojea wewe,

Ee Bwana Mungu wangu, utajibu.

¹⁶Kwa kuwa nilisema, “Usiwaache wafurahie,

wala wajitukuze juu yangu

mguu wangu unapoteleza.”

¹⁷Kwa maana ninakaribia kuanguka,

na maumivu yangu yananiandama siku zote.

¹⁸Naungama uovu wangu,

ninataabishwa na dhambi yangu.

¹⁹Wengi wamekua adui zangu bila sababu;

wale wanaonichukia bure ni wengi.

²⁰Wanaolipa wema wangu kwa maovu

hunisingizia ninapofuata lililo jema.

²¹Ee Bwana , usiniache,

usiwe mbali nami, Ee Mungu wangu.

²²Ee Bwana Mwokozi wangu,

uje upesi kunisaidia.