Zaburi 96

Mungu Mfalme mkuu

¹Mwimbieni Bwana wimbo mpya;

mwimbieni Bwana dunia yote.

²Mwimbieni Bwana , lisifuni jina lake;

tangazeni wokovu wake siku baada ya siku.

³Tangazeni utukufu wake katika mataifa,

matendo yake ya ajabu miongoni mwa mataifa yote.

⁴Kwa kuwa Bwana ni mkuu mwenye kustahili kusifiwa kuliko wote;

yeye ni wa kuogopwa kuliko miungu yote.

⁵Kwa maana miungu yote ya mataifa ni sanamu,

lakini Bwana aliziumba mbingu.

⁶Fahari na enzi viko mbele yake;

nguvu na utukufu vimo patakatifu pake.

⁷Mpeni Bwana , enyi jamaa za mataifa,

mpeni Bwana utukufu na nguvu.

⁸Mpeni Bwana utukufu unaostahili jina lake;

leteni sadaka na mje katika nyua zake.

⁹Mwabuduni Bwana katika uzuri wa utakatifu wake;

dunia yote na itetemeke mbele zake.

¹⁰Semeni katika mataifa kwamba, “Bwana anatawala.”

Ulimwengu ameuweka imara, hauwezi kusogezwa;

atawahukumu watu kwa uadilifu.

¹¹Mbingu na zishangilie, nchi na ifurahi;

bahari na ivume, na vyote vilivyo ndani yake;

¹²mashamba na yashangilie,

pamoja na vyote vilivyomo.

Kisha miti yote ya msituni itaimba kwa furaha;

¹³itaimba mbele za Bwana kwa maana anakuja,

anakuja kuihukumu dunia.

Ataihukumu dunia kwa haki,

na mataifa katika kweli yake.