Sala kwa ukombozi wa kitaifa na usalama

¹Na ahimidiwe BWANA, mwamba wangu,[#2 Sam 22:35]

Aifundishaye mikono yangu vita,

Na vidole vyangu kupigana.

²Mwamba wangu na ngome yangu,[#144:2 Au Mhisani.]

Nguzo yangu na mwokozi wangu

Ngao yangu ninayemkimbilia,

Huwatiisha watu wangu chini yangu.

³Ee BWANA, mtu ni kitu gani hata umjali?[#Ayu 7:17-18; Zab 8:4; Ebr 2:6]

Na binadamu hata umwangalie?

⁴Binadamu ni kama ubatili,

Siku zake ni kama kivuli kipitacho.

⁵Ee BWANA, uziinamishe mbingu zako, ushuke chini.[#Isa 64:1]

Uiguse milima ili nayo itoe moshi.

⁶Utupe umeme, uwatawanye,

Uipige mishale yako, uwafadhaishe.

⁷Uinyoshe mikono yako toka juu, uniponye,[#Zab 69:1; Mal 2:11]

Unitoe katika maji mengi, na mkono wa wageni,

⁸Vinywa vyao vinasema visivyofaa,

Na ambao mikono yao ya kuume ni ya uongo.

⁹Ee Mungu, nitakuimbia wimbo mpya,[#Zab 33:2]

Kwa kinanda chenye nyuzi kumi nitakuimbia.

¹⁰Awapaye wafalme wokovu,

Amwokoa Daudi, mtumishi wake, na upanga wa uovu.

¹¹Uniponye, unitoe,

Katika mkono wa wageni.

Vinywa vyao vyasema visivyofaa,

Na mkono wao wa kuume ni mkono wa uongo.

¹²Wavulana wetu wakiwa ujanani wawe kama miche

Iliyostawi kikamilifu.

Binti zetu wawe kama nguzo za pembeni

Zilizochongwa ili kupamba nyumba ya mfalme.

¹³Ghala zetu na zijae

Zenye akiba za jinsi zote.

Kondoo zetu na wazae

Elfu na makumi elfu mashambani mwetu.

¹⁴Ng'ombe wetu na wabebe mizigo mizito,[#Law 26:17]

Kusiwe na kushambuliwa.

Wala kusiwe na kuhamishwa,

Wala malalamiko katika njia zetu.

¹⁵Heri watu wenye hali hiyo,[#Kum 33:29]

Heri watu wenye BWANA kuwa Mungu wao.