Sala ya kumtakia mfalme neema

¹Ee Mungu, mpe mfalme hukumu zako,

Na mwana wa mfalme haki yako.

²Atawaamua watu wako kwa haki,[#Isa 11:2]

Na watu wako walioonewa kwa hukumu.

³Milima na iwaletee watu amani,

Na pamoja na vilima, vilete haki.

⁴Na atawatetea watu walioonewa,

Awaokoe wahitaji, na kumwaangamiza mdhalimu.

⁵Watakuogopa wakati wote wa kudumu jua,

Na wakati wa kung'aa mwezi kizazi hata kizazi.

⁶Atashuka kama mvua juu ya majani yaliyokatwa,[#2 Sam 23:4; Hos 6:3]

Kama manyunyu yainyweshayo nchi.

⁷Haki na isitawi wakati wa maisha yake yote,[#Isa 2:4; Dan 2:44; Lk 1:33]

Nayo amani iwepo, hadi mwezi utakapokoma.

⁸Na awe na enzi toka bahari hadi bahari,[#Kut 23:31; 1 Fal 4:21,24; Zab 2:8; Zek 9:10]

Toka Mto hadi miisho ya dunia.

⁹Wakaao jangwani na wainame mbele zake;

Adui zake na warambe mavumbi.

¹⁰Wafalme wa Tarshishi na visiwa na walete kodi;[#Isa 49:7]

Wafalme wa Sheba na Seba na watoe vipawa.

¹¹Naam, wafalme wote na wamsujudie;

Na mataifa yote wamtumikie.

¹²Kwa maana atamkomboa mhitaji aliapo,

Na mtu aliyeonewa iwapo hana msaidizi.

¹³Atawahurumia wanyonge na maskini,

Na nafsi za wahitaji ataziokoa.

¹⁴Atawakomboa kutoka kwa maonevu na udhalimu,

Maana damu yao ina thamani machoni pake.

¹⁵Na aishi maisha marefu![#Mt 6:10; 1 Kor 1:2,3]

Na wampe dhahabu ya Sheba;

Na wamwombee daima;

Na kumbariki mchana kutwa.

¹⁶Na uwepo wingi wa nafaka[#1 Fal 4:20]

Katika ardhi juu ya milima;

Matunda yake na yawayewaye kama ilivyo katika milima ya Lebanoni,

Na watu wa mjini wasitawi kama majani ya nchi.

¹⁷Jina lake na lidumu milele,[#Mwa 12:3; Yer 4:2; Isa 45:23,24; Lk 1:48; Flp 2:9-11]

Pindi ling'aapo jua, umaarufu wake uwepo;

Mataifa yote na wabarikiwe katika yeye,

Na kumwita heri.

* * *

¹⁸Na ahimidiwe BWANA, Mungu, Mungu wa Israeli,

Atendaye miujiza Yeye peke yake;

¹⁹Jina lake tukufu na lihimidiwe milele;

Dunia yote na ijae utukufu wake. Amina na Amina.

* * *

²⁰Maombi ya Daudi mwana wa Yese, yamekwisha.