MKUSANYO WA MITHALI

Kusifu Hekima

¹Hekima yote yatoka kwa BWANA,[#Mit 2:6]

Nayo yakaa kwake hata milele.

²Nani awezaye kuhesabu

Mchanga wa bahari na matone ya mvua

Na siku za milele?

³Nani awezaye kutafuta

Kimo cha mbingu na upana wa dunia

Na kina cha bahari?

⁴Hekima iliumbwa kabla ya vitu vyote,

⁵Na ufahamu wa busara tangu milele.

⁶Nani aliyefunuliwa shina la hekima?

⁷Nani aliyejua mashauri yake merevu?

⁸Yuko Mmoja aliye na hekima,

Naye yu wa kuogopwa sana,

Ameketi katika kiti chake cha enzi.

⁹BWANA ndiye aliyeiumba[#Mit 8:22-31; Sira 29:9]

Na kuiona na kuihesabu,

Na kuimwaga juu ya kazi zake zote.

¹⁰Ina wote wenye mwili kama aitoavyo,

Na wale wampendao amewapa kwa wingi.

Kumcha Mungu ni Hekima ya Kweli

¹¹Kumcha BWANA

Ni heshima na utukufu,

Na furaha na taji la shangwe.

¹²Kumcha BWANA

Kunachangamsha moyo,

Na kuleta sherehe na maisha kunjufu.

¹³Kumcha BWANA

Kwamletea mtu heri mwishowe,

Na siku ya kufa kwake atabarikiwa.

¹⁴Kumcha BWANA

Ni chanzo cha hekima,

Imeumbwa tumboni pamoja na waamini.

¹⁵Kwa watu imekaa tangu awali,

Pia itadumu kwa wazao wao.

¹⁶Kumcha BWANA

Ni utimilifu wa hekima,

Inashibisha wanadamu matunda yake.

¹⁷Itajaza nyumba pia vitakiwavyo,[#Hek 7:11]

Na ghala zitajazwa mavuno yake.

¹⁸Kumcha BWANA

Ni taji la hekima,

Inasitawisha amani na afya nzuri.

¹⁹Kumcha BWANA

Ni gongo na nguzo tukufu,

Ni heshima ya daima kwao waishikao.

²⁰Kumcha BWANA[#Mit 3:16; 4:10]

Ni shina la hekima,

²¹Na matawi yake ni maisha mengi.

Saburi na kujiweza

²²Hasira isiyo haki haiwezi kuthibitishwa,

Maana ukali wa ghadhabu ni maangamizi yake.

²³Mtu aliye mvumilivu atastahimili hata wakati ufaao, na hatimaye ukunjufu wa moyo utaanza kukua ndani yake.

²⁴Aidha, ujapo wakati ufaao atayaficha maneno yake, na wengi kwa midomo yao watautangaza ufahamu wake.

Hekima na unyofu

²⁵Mithali za elimu zimo kazini mwa hekima,

Bali utawa ni chukizo kwa mkosefu.

²⁶Ukitamani hekima uzishike amri, naye BWANA atakupa tele;

²⁷yaani, kumcha BWANA ndiyo hekima na mafundisho, tena imani na unyenyekevu ndiyo mapenzi yake.

²⁸Usikatae kumcha BWANA kama una haja,

Wala usimkaribie nawe una nia mbili.

²⁹Usiwe mnafiki machoni pa watu, tena kuhusu midomo yako ufanye hadhari.

³⁰Wewe usijikuze mwenyewe, usije ukaanguka na kujiaibisha roho yako; madhali BWANA atazifunua siri zako, na kukuangamiza katikati ya kusanyiko, kwa sababu hukumfikilia BWANA mwenye kicho, lakini moyo wako umejaa hila.