¹Uovu haumpati yeye amchaye BWANA;

Mara kwa mara atamwokoa majaribuni;

²Aichukiaye torati hapati hekima;

Mnafiki hutikisika kama dau dhorubani.

³Mwenye ufahamu hutambua neno la BWANA;[#Kut 28:30; Sira 45:10]

Torati ni amini kama kuuliza kwa Urimu.

⁴Ujiweke tayari kusema, nawe utasikiwa;

Uyafunge maarifa, nawe utafanya kujibu.

⁵Moyo wa mpumbavu ni kama gurudumu,

Na mawazo yake huzunguka zunguka.

⁶Farasi dume ni kama rafiki akuchekaye,

Hulia chini ya mtu yeyote ampandaye.

Tofauti kati ya ulimwengu na mtu

⁷Ya nini siku moja kupita nyingine;

Nuru ya kila siku ya mwaka si ya jua?

⁸Kwa maarifa ya BWANA zimepambanuka.

Naye amebadili majira na sikukuu;

⁹Nyingine amezikuza na kuziweka wakfu,

Na nyingine amezifanya siku za kawaida.

¹⁰Hivyo watu wote wametoka katika ardhi,

Naye Adamu aliumbwa katika udongo;

¹¹Kwa hekima yake BWANA amewapambanua.

Na kufanya njia zao kuwa mbalimbali.

¹²Wengine amewabariki na kuwatukuza,

Wengine amewaweka wakfu karibu naye;

Wengine amewalaani na kuwaangamiza.

Na kuwaangusha katika mahali pao.

¹³Kama udongo mkononi mwa mfinyanzi,

Wote wamo mkononi mwake aliyewaumba;

Njia zake ni sawasawa na mapenzi yake,

Kuwaamuru kwa kadiri ya hukumu zake;

¹⁴Wema juu ya uovu na uzima juu ya mauti,

Hivyo na mwenye haki juu ya mkosaji.

¹⁵Basi, uyafikiri hivyo

Matendo yake Aliye Juu;

Hayo ni mawili mawili,

Hili juu ya hili.

¹⁶Mimi niliamka siku hizi za mwisho, mithili ya mtu mwenye kuokota masazo nyuma ya wavuna zabibu;

¹⁷lakini kwa baraka ya BWANA nimeendelea, na kulijaza shinikizo langu sawasawa kama mvunaji.

¹⁸Fikirini ya kwamba sikufanya kazi kwa ajili yangu tu, ila kwa ajili ya wote waitafutao elimu.

¹⁹Enyi wakuu wa watu, mnisikilize; nanyi mtawalao kusanyiko mnitegee masikio yenu.

Faida ya kujitegemea

²⁰Usimpe mwana nguvu juu yako wakati unapoishi, wala mke wako, wala ndugu, wala rafiki; nawe ukiwa bado hai, unavuta pumzi. Wala usimtolee mwingine mali zako, usije ukajuta na kuziomba tena.

²¹Usijitie katika uwezo wa mtu yeyote.

²²Ni afadhali watoto wako wakuombe wewe, kuliko wewe kuutazamia mkono wa wanao.

²³Katika matendo yako yote ukae unayo mamlaka, wala usitie ila heshima yako.

²⁴Lakini siku ile utakapozikomesha siku za maisha yako, na hapo ujapo kufariki; utoe usia na kuugawa urithi wako.

Jinsi ya kutendea watumwa

²⁵Malisho, fimbo na mizigo,

Kwa punda;

Chakula, mapigo na kazi,

Kwa mtumwa.

²⁶Mpe mtumwa wako kazi, nawe utastarehe; ukimwacha hana kazi, atatafuta uhuru wake.

²⁷Kongwa na vifungo huinamisha shingo, na kwa mtumwa mwovu kuna kushtusha viungo na adhabu kali.

²⁸Lakini umpeleke kazini asiwe mvivu madhali uvivu hufundisha fujo tele.

²⁹Umpe kazi itakayomjuzu, asipotii umfanyie nzito pingu zake.

³⁰Lakini usipite kiasi kwa mtu yeyote, wala usifanye neno pasipo hukumu.

³¹Iwapo unaye mtumwa mmoja tu, na awe kama nafsi yako; mradi ni hasara yako ukipotewa naye.

³²Iwapo unaye mtumwa mmoja tu, umtendee kama ndugu; maana usimtende mabaya aliye damu yako.

³³Nawe ukimtenda mabaya akakutoroka, je! Utafuata njia ipi ili kumtafuta?