¹Anayeishika sheria ametoa sadaka nyingi.

²Anayezifuata amri ametoa sadaka za amani.

³Anayerudisha shukrani anatoa sadaka ya nafaka safi;

⁴naye anayemsaidia maskini anatoa sadaka ya shukrani.

⁵Kuachana na uovu kunampendeza Bwana,

na kuacha ubaya ni kujiletea upatanisho.

⁶Usiende mbele za Bwana mikono mitupu,

⁷maana vitu hivi vyote vinatakiwa na amri;

⁸sadaka ya mtu mwadilifu huipaka madhabahu mafuta

na harufu yake nzuri hupanda mbele ya Mungu Mkuu.

⁹Sadaka ya mwadilifu hukubaliwa;

nayo haitasahaulika milele.

¹⁰Mtukuze Bwana kwa ukarimu,

wala usiwe mchoyo juu ya mazao yako ya kwanza.

¹¹Zawadi zako zote uzitoe kwa moyo mkunjufu,

weka wakfu zaka zako kwa furaha.

¹²Mpe Mungu Mkuu kama alivyokupa,

uwe mkarimu kwa kadiri ulivyo navyo.

¹³Maana Bwana ndiye anayelipa,

naye atakulipa mara saba.

¹⁴Usijaribu kumhonga, maana hatapokea,

¹⁵wala usitegemee sadaka ulizopata kwa udanganyifu.

Maana Bwana ni hakimu, wala hana upendeleo.

Haki ya Mungu

¹⁶Bwana hataonesha upendeleo kwa maskini;

aliyekosewa anapomwomba, humsikiliza.

¹⁷Yeye hayapuuzi maombi ya yatima,

wala maombi ya mjane anapomwambia kisa chake.

¹⁸Machozi ya mjane hutiririka mashavuni mwake,

¹⁹yakimshtaki mtu aliyesababisha mateso yake.

²⁰Anayemtumikia Bwana na kumpendeza atakubaliwa naye,

sala yake itafika mbinguni.

²¹Sala ya mnyenyekevu huyapenya mawingu,

nayo haitasimama mpaka imemfikia Bwana.

Hataacha kuomba mpaka Mungu Mkuu amemjibu,

²²akamwokoa mwadilifu na kutoa hukumu.

Bwana hatakawia wala hatawaonesha uvumilivu,

mpaka atakapowaponda wasio na huruma,

²³na huyalipiza kisasi mataifa maovu;

mpaka awaangamize wenye kiburi wengi

na kuvunjilia mbali utawala wa waovu.

²⁴Atawalipiza kisasi watu kadiri ya matendo yao,

kila mtu kulingana na mipango yake,

²⁵mpaka atakapoamua kisa cha watu wake

na kuwafanya wafurahi kwa sababu ya huruma yake.

²⁶Nyakati za shida, huruma yake hupokelewa kwa furaha

kama mvua wakati wa ukame.