Sala kwa ajili ya Israeli

¹Utuhurumie ee Bwana Mungu wa wote;

Yafanye mataifa yote yakuogope.

Inua mkono wako dhidi ya mataifa mengine,

²uyafanye yauone uwezo wako mkuu.

³Kama ulivyotutumia kuyaonesha jinsi ulivyo mtakatifu,

vivyo hivyo yatumie kutuonesha utukufu wako.

⁴Nayo yatajua kama tunavyojua na sisi,

kwamba hakuna Mungu ila wewe, ee Bwana.

⁵Fanya tena ishara na kufanya miujiza zaidi,

ufanye mkono wako uwe na utukufu zaidi.

⁶Onesha hasira yako na kumwaga ghadhabu yako;

waangamize wapinzani na kuwafuta maadui.

⁷Iharakishe ile siku na kukumbuka kiapo chako;

⁸wafanye watu wasimulie matendo yako makuu.

Yeyote atakayeponyoka ateketezwe na ghadhabu yako kali,

na wale wanaowadhuru watu wako wapate maangamizi.

⁹Uwaponde wakuu wa maadui zako,

ambao husema: “Hakuna mwingine ila sisi wenyewe!”

¹⁰Yakusanye pamoja makabila yote ya Yakobo,

uwape mali yako kama ulivyopanga mwanzoni.

¹¹Wahurumie ee Bwana watu wanaoitwa kwa jina lako;

Waisraeli uliowaita mzaliwa wako wa kwanza wa kiume.

¹²Uuonee huruma mji wa hekalu lako,

Yerusalemu, mji wa pumziko lako.

¹³Uujaze mji wa Siyoni shangwe za matendo yako ya ajabu,

na hekalu lako lijae utukufu wako.

¹⁴Uwahakiki watu wako uliowaumba mwanzoni,

na kutimiza unabii uliosemwa kwa jina lako.

¹⁵Uwatuze wale wanaokungojea,

na manabii wako waonekane kuwa ni wa kuaminika.

¹⁶Usikilize, ee Bwana, sala ya watumishi wako,

kulingana na baraka za Aroni juu ya watu wako.

¹⁷Hivyo binadamu wote duniani watajua

kuwa wewe ndiwe Bwana, Mungu wa nyakati zote.

Kuchagua mke

¹⁸Chakula chochote chaweza kuliwa,

lakini chakula kingine ni bora kuliko kingine.

¹⁹Kama ulimi upimavyo mionjo ya aina ya vyakula,

ndivyo na mwenye akili agunduavyo maneno ya uongo.

²⁰Mwenye akili potovu atasababisha huzuni,

lakini mwenye uzoefu wa maisha atamlipa inavyofaa.

²¹Mwanamke aweza kuolewa na yeyote,

akini msichana mmoja ni bora kuliko mwingine.

²²Uzuri wa mwanamke hufurahisha uso,

na hushinda kila kitu anachotamani mwanamume.

²³Kama mwanamke ni mwema na mwenye adabu anapoongea,

mumewe ana bahati kuliko wengine wote.

²⁴Mwanamume akipata mke amepata ubora mkubwa mno,

amejipatia msaidizi bora na nguzo ya msaada.

²⁵Mali isiyolindwa kwa ukuta itaporwa;

ni pasipo mke, mwanamume atatangatanga na kusononeka.

²⁶Nani atakayemwamini jambazi azururaye mji hata mji?

²⁷Hivyo hakuna atakayemwamini mwanamume asiye na kwake,

ambaye ana malazi popote usiku unapomkuta.