Ahazi ni mfalme mbaya.

¹Ahazi alikuwa mwenye miaka 20 alipoupata ufalme, akawa mfalme miaka 16 mle Yerusalemu; hakuyafanya yanyokayo machoni pake Bwana kama baba yake Dawidi,

²ila akaendelea kuzishika njia za wafalme wa Waisiraeli, akatengeneza navyo vinyago vya Mabaali vilivyoyeyushwa.

³Naye yeye akavukiza bondone kwa Bin-Hinomu, hata wanawe akawatumia kuwa ng'ombe za tambiko za kuteketezwa motoni akiyafuata hayo matapisho ya wamizimu, Bwana aliowafukuza mbele ya wana wa Isiraeli.[#5 Mose 18:9-10,12.]

⁴Akatambika na kuvukiza vilimani pa kutambikia napo pengine palipoinukia juu, hata chini ya kila mti uliokuwa wenye majani mengi.[#1 Fal. 14:23.]

⁵Kwa hiyo Bwana akamtia mkononi mwa mfalme wa Ushami, wakampiga, wakateka kwake mateka mengi, wakawapeleka Damasko. Akatiwa hata mkononi mwa mfalme wa Waisiraeli aliyempiga pigo kubwa.

⁶Kwani Peka, mwana wa Remalia, akaua katika nchi ya Yuda siku moja watu 120000, wote walikuwa wenye nguvu, kwa kuwa walimwacha Bwana Mungu wa baba zao.

⁷Hata Zikiri, fundi wa vita wa Waefuraimu, akamwua Masea, mwana wa mfalme, na Azirikamu, mkuu wa nyumba ya mfalme, na Elkana aliyemfuata mfalme kwa ukuu.

⁸Nao wana wa Isiraeli wakateka kwa ndugu zao 200000, wanawake na watoto wa kiume na wa kike na mali nyingi, walizozinyang'anya kwao; haya mateka wakayapeleka Samaria.

Mfumbuaji Odedi.

⁹Huko kulikuwa na mfumbuaji wa Bwana, jina lake Odedi. Huyu akavitokea vile vikosi, vilipoingia Samaria, akawaambia: Tazameni! Kwa kuwa Bwana Mungu wa baba zenu amewakasirikia sana Wayuda, akawatia mikononi mwenu, lakini ninyi kwa machafuko mkamwaga kwao damu nyingi zilizofika hata mbinguni.[#1 Mose 18:21; Ezr. 9:6.]

¹⁰Sasa ninyi mwataka kuwanyenyekeza kwa nguvu hawa wana wa Yuda na wa Yerusalemu, wawe watumwa na vijakazi wenu. Lakini nanyi mliyojipatia kwake Bwana Mungu wenu sizo manza tu, mlizozikora?

¹¹Kwa hiyo nisikieni sasa, mrudishe kwao mateka, mliyoyateka kwa ndugu zenu! Kwani nanyi makali ya Bwana yawakayo moto yanawakalia.

¹²Ndipo, walipoinuka waume waliokuwa wakuu wa wana wa Efuraimu, ndio Azaria, mwana wa Yohana, Berekia, mwana wa Mesilemoti, na Hizikia, mwana wa Salumu, na Amasa, mwana wa Hadilai; hawa wakawainukia waliotoka vitani,

¹³wakawaambia: Msiyalete mateka yenu hapa! Kwani hivyo tutakora manza kwa Bwana, nanyi mnataka kweli kuyaongeza makosa yetu na manza zetu, kwani manza zetu ni nyingi, nayo makali yawakayo moto yanatukalia sisi Waisiraeli.

¹⁴Ndipo, wapiga vita walipoyaacha mateka yao machoni pao wakuu napo pao mkutano wote pamoja na zile mali, walizozinyang'anya;

¹⁵nao wale waume waliotajwa hapa juu majina yao wakainuka kuyachukua hayo mateka, kisha wote waliokuwa uchi wakawavika wakiwapa nguo na viatu na kuvitoa mlemle katika mapokonyo, kisha wakawapa vyakula na vya kunywa na mafuta ya kukipaka, nao wote waliojikwaakwaa wakawapandisha punda, wakawapeleka kwa ndugu zao Yeriko, ule mji wenye mitende, kisha wakarudi Samaria.[#Fano. 25:21-22.]

Mungu anampatiliza Ahazi.

¹⁶Siku zile mfalme Ahazi akatuma kwao wafalme wa Asuri, waje kumsaidia,

¹⁷kwa maana Waedomu walikuja tena, wakawapiga, wakachukua mateka.

¹⁸Nao Wafilisti wakaiingia miji ya nchi ya tambarare na miji ya kusini katika nchi ya Yuda na kunyang'anya mali, wakateka Beti-Semesi na Ayaloni na Gederoti na Soko na mitaa yake na Timuna na mitaa yake na Gimuzo na mitaa yake, wakakaa humo.

¹⁹Kwani Bwana aliwanyenyekeza Wayuda kwa ajili ya Ahazi, mfalme wa Waisiraeli, kwani aliwalegeza Wayuda alipomvunjia Bwana maagano.

²⁰Ndipo, Tilgati-Pilneseri, mfalme wa Asuri, alipomjia, lakini akamsonga, hakumpatia nguvu.

²¹Kwani Ahazi alichukua kwa nguvu yaliyokuwamo Nyumbani mwa Bwana namo nyumbani mwa mfalme nazo mali za wakuu, akampa mfalme wa Asuri, lakini hakusaidiwa naye.

²²Papo hapo, aliposongeka, yeye mfalme Ahazi akazidi kumvunjia Bwana maagano,

²³akaitumikia miungu ya Damasko iliyompiga, akasema: kwa kuwa miungu ya wafalme wa Ushami ndiyo iliyowasaidia, basi, nitaitambikia hiyohiyo, wanisadie; nayo ndiyo iliyomkwaza mwenyewe na Waisiraeli wote.

²⁴Kisha Ahazi akavikusanya vyombo vya Nyumba ya Mungu, akavivunjavunja hivyo vyombo vya Nyumba ya Mungu, akaifunga milango ya Nyumba ya Bwana, akajitengenezea pa kutambikia pembeni po pote mle Yerusalemu.

²⁵Hata kila mji mmoja wa Yuda akautengenezea vilima vya kuvukizia miungu mingine juu yao; ndivyo, alivyomkasirisha Bwana Mungu wa baba zake.

Kufa kwake Ahazi.

²⁶Mambo yake mengine na njia zake zote, za kwanza na za mwisho, tunaziona, zimeandikwa katika kitabu cha wafalme wa Wayuda na wa Waisiraeli.

²⁷Kisha Ahazi akaja kulala na baba zake, wakamzika katika mji wa Yerusalemu, kwani hawakumpeleka penye makaburi ya wafalme wa Waisraeli. Naye mwanawe Hizikia akawa mfalme mahali pake.[#2 Mambo 21:20.]