Mbegu zako zimwage mapema!

¹Mali zinazokutunza zitume kwenda ng'ambo ya bahari! Siku zitakapopita nyingi, utaziona tena.[#Fano. 19:17.]

²Nyingine uzigawie watu saba au wanane, kwani huyajui mabaya yatakayokuwa katika nchi.

³Mawingu yakijaa mvua huimiminia nchi. Tena mti ukiangukia upande wa kusini au wa kaskazini, basi, mahali papo hapo, mti ulipoangukia, ndipo, utakapokuwa.

⁴Auangaliaye upepo hatamwaga mbegu, wala ayatazamaye mawingu hatavuna.

⁵Kama asivyopatikana mtu anayeijua njia ya upepo, wala jinsi mifupa inavyotengenezeka kuwa mtoto tumboni mwake mwenye mimba, vivyo hivyo nawe huyajui matendo ya Mungu, anayoyatenda yote.[#Yoh. 3:6; Mbiu. 8:17.]

⁶Asubuhi zimwage mbegu zako, tena jioni usiulegeze mkono! Kwani hujui, kama ni hizi au ni zile zitakazofaa, au kama zote mbili pamoja zitazaa vema.

⁷Kweli mwanga ni mtamu, nako kuliona jua hupendeza macho.

⁸Kama mtu anapata miaka mingi ya kuishi, na aifurahie yote akizikumbuka siku za giza zitakazokuwa nyingi nazo; yote yatakayofuata ni ya bure.

⁹Wewe kijana, ufurahie utoto wako, moyo wako ule mema siku za ujana wako! Kazishike njia, moyo wako uzitakazo, kayafuate, macho yako yanayoyatazamia! Lakini ujue, ya kuwa hayo yote Mungu atakutakia shauri.[#Mbiu. 8:15.]

¹⁰Jiepushe penye masikitiko, yasiingie moyoni mwako, nayo mabaya yaangalie, yaupitie mwili wako mbali! Kwani utoto na ujana ni wa bure.