Huruma zake Mungu zilizo kuu.

¹Isiraeli alipokuwa kijana, nilimpenda; huko Misri ndiko, nilikomwitia mwanangu.[#2 Mose 4:22; Mat. 2:15.]

²Lakini walipowaita halafu, ndipo, walipokwenda zao na kutoka kwao hao, wakayatambikia Mabaali na kuvukizia vinyago.

³Nami mwenyewe nalimfundisha Efuraimu kwenda kwa miguu kama mtoto, nikawashika mikono, lakini hawakutambua, ya kuwa ninawaponya.

⁴Naliwavuta kwa kamba zimfaazo mtu na kwa vigwe vya upendo, nikawa nikiwatua mizigo mabegani pao, nikawainamia, nipate kuwalisha chakula.

⁵Hawatarudi katika nchi ya Misri, ila Mwasuri ndiye atakayekuwa mfalme wao, kwani wamekataa kurudi kwangu.

⁶Nazo panga zitazunguka mijini mwao, ziyamalize makomeo yao kwa kuyala kwa ajili ya mashauri yao.

⁷Walio ukoo wangu hujipingia kuniacha; wakiitwa kurudi kwake Alioko huko juu, kwao wote hakuna atakayemtukuza.

⁸Nitawezaje kukutoa Efuraimu au kukuacha, Isiraeli?

Nitawezaje kukutoa, uwe kama Adima (Sodomu),

au kukugeuza, uwe kama Seboimu (Gomora)?

Moyo wangu ungefudikizwa kifuani mwangu,

ungechafuka sana kwa kukuonea uchungu.

⁹Sitayafanya, ukali wangu wenye moto uyatakayo,

sitamwangamiza tena Efuraimu,

kwani mimi ni Mungu, si mtu;

namo katikati yenu mimi ni mtakatifu,

nisije kuingia kwenu kwa machafuko.

¹⁰Watakuja kumtafuta Bwana, atakaponguruma kama simba;

kweli atakaponguruma, ndipo, watakapokuja kwa kutetemeka

wao watoto watokao upande wa baharini.

¹¹Watamkimbilia kama ndege kwa kutetemeka wakitoka Misri,

au kama hua wakiitoka nchi ya Asuri;

ndipo, nitakapowakalisha nyumbani mwao; ndivyo, asemavyo Bwana.