¹Hapo waiteni ndugu zenu Ukoo wangu na maumbu zenu Huhurumiwa![#Hos. 1:6,9.]

Agano la Mungu linavunjwa nao walio ukoo wake.

²Mgombezeni mama yenu! Haya! Mgombezeni!

Kwani yeye siye mke wangu, nami si mumewe.

Na auondoe ugoni wake, usiwe mbele yake,

nao uzinzi wake, usiwe penye maziwa yake,

³nisije kumvua, akawa mwenye uchi,

na kumweka, awe, kama alivyokuwa siku ile, alipozaliwa,

nikamgeuza kuwa kama nyika,

nikamfanya kuwa kama nchi kavu nikimwua kwa kiu.

⁴Nao wanawe sitawahurumia, kwani ndio wana wa ugoni;

⁵kwa kuwa mama yao amefanya ugoni,

akatenda yenye soni yeye aliyewachukua mimba,

maana alisema: Nitawafuata wapenzi wangu

wanipao chakula changu na maji yangu,

nayo manyoya yangu ya kondoo na pamba zangu,

nayo mafuta yangu na vinywaji vyangu.

⁶Kwa hiyo utaniona, nikiiziba njia yako kwa miiba,

nitajenga hata ukuta, asione pake pa kupitia.

⁷Atakapowakimbilia wapenzi wake, asiwafikie,

atakapowatafuta, asiwaone;

ndipo, atakaposema: Na nije kumrudia mume wangu wa kwanza,

kwani hapo naliona mema kuliko sasa.

⁸Naye hajui, ya kuwa ni mimi niliyempa

zile ngano na zile pombe na yale mafuta,

ya kuwa ni mimi niliyemzidishia fedha na dhahabu, walizomtolea Baali.

⁹Kwa hiyo na nirudi kuzichukua ngano zangu, siku zitakapotimia,

nazo pombe zangu, pangu patakapotimia,

nitampokonya nguo zangu za manyoya ya kondoo na za pamba,

alizo nazo za kuufunika uchi wake.

¹⁰Sasa nitayafunua yake yenye soni machoni pa wapenzi wake,

tena hakuna mtu atakayemponya mkononi mwangu.

¹¹Nitazikomesha furaha zake zote na sikukuu zake

za miandamo ya mwezi nazo za mapumziko na mikutano yake yote.

¹²Nitaiharibu mizabibu yake na mikuyu yake,

aliyoisema: Hii ndiyo kipaji, wapenzi wangu walichonipa;

nitaigeuza kuwa misitu, nyama wa porini waile.

¹³Nitampatilizia siku za kuvitambikia vinyago vya Baali,

alivyovivukizia uvumba

alipojipamba na kuvaa pete zake na ushanga wake

akiwafuata wapenzi wake kwa kunisahau mimi;

ndivyo, asemavyo Bwana.

Mungu analirudia Agano lake la kale.

¹⁴Kwa hiyo mtaniona, nikimbembeleza na kumpeleka nyikani,

niseme naye kimoyomoyo.

¹⁵Ndiko, nitakakompa mizabibu yake, akitoka huko,

nalo Bonde la Akori nitaligeuza kuwa mlango wa kingojeo;

ndipo, atakapoitika kama hapo, alipokuwa kijana,

alipotoka katika nchi ya Misri kuja huku.

¹⁶Ndivyo asemavyo Bwana:

Siku hiyo ndipo, utakaponiita Mume wangu,

usiniite tena Bwana wangu.

¹⁷Ndipo, nitakapoyaondoa majina ya vinyago vya Baali kinywani mwako,

visitajwe tena kwa majina yao.

¹⁸Siku hiyo nitawafanyia agano

nao nyama wa porini n ndege wa angani na wadudu wa

nchini,

nitayavunja mata na panga na magombano,

yatoke katika nchi hiyo, niwakalishe salama.

¹⁹Nitakuposa, uwe wangu kale na kale,

nitakuposa, uwe wangu kwa mashauri yaongokayo

na kwa huruma zenye upole.

²⁰Nitakuposa, uwe wangu kwa kweli;

ndipo, utakapomjua Bwana.

²¹Siku hiyo ndipo, nitakapoitikia; ndivyo, asemavyo

Bwana;

nitaziitikia mbingu nazo zitaiitikia nchi hii.

²²Nayo nchi hii itaziitikia ngano, nazo pombe na mafuta,

nayo hayo yatamwitikia Izireeli (Mungu mpanzi).

²³Nami nitampanda katika nchi hii, awe wangu, nimhurumie

Hahurumiwi,

tena nitamwambia Si ukoo wangu: Ndiwe Ukoo wangu,

naye atasema: Ndiwe Mungu wangu.