Mapigo ya Bwana huleta majuto.

¹Njoni, tumrudie Bwana!

Yeye aliyeturarua ndiye atakayetuponya,

yeye aliyetupiga ndiye atakayetufunga vidonda.

²Ataturudisha uzimani, siku mbili zitakapopita.

Siku ya tatu atatuinua; ndipo, tutakapokuwa wazima mbele yake,

³ndipo, tutakapojua maana, tujihimize kumjua Bwana;

hana budi kutokea, kama mapambazuko yasivyokuwa na budi kutokea;

atatujia kama mvua, kama mvua ya vuli inyweshayo nchi.

⁴Nikufanyizie nini wewe Efuraimu?

nikufanyie nini, wewe Yuda?

Magawio yenu hufanana na wingu la asubuhi,

tena na umande unaokauka mapema.

⁵Kwa hiyo nimewapiga kwa wafumbuaji,

nikawaua kwa maneno ya kinywa changu,

mapatilizo yako hayana budi kutokea kama mwanga;

⁶kwani huruma ndizo zitazonipendeza,

vipaji vya tambiko sivyo;

kumjua Mungu hupita ng'ombe za tambiko,

ijapo ziwe za kuteketezwa nzima.

⁷Lakini wao kwa kimtu chao huvunja agano;

ndivyo, wanavyoniacha kwa udanganyifu.

⁸Gileadi ni mji wao wafanyao maovu, nyayo zao hujaa damu.

⁹Kama wanyang'anyi wanavyomwotea mtu,

ndivyo, chama cha watambikaji kinavyoua katika njia ya kwenda Sikemu;

ndiko, walikofanya mabaya, waliyokwisha kuyawaza.

¹⁰Kwao walio mlango wa Isiraeli nimeona mambo yazizimuayo;

ndiko, Efuraimu anakofanya ugoni, Isiraeli naye hujichafua.

¹¹Nawe Yuda, utakayoyavuna, yako tayari;

itakuwa hapo, nitakapoyafungua mafungo yao walio ukoo wangu.