Makosa makubwa ya Waisiraeli.

¹Weka baragumu midomoni pako kwamba:

Yuko atakayeijia Nyumba ya Bwana kama tai!

Wamelivunja Agano langu, wakayakosea Maonyo yangu.

²Watanililia kwamba: Mungu wetu, sisi Waisiraeli tunakujua!

³Lakini Isiraeli ameyatupa yaliyo mema, kwa hiyo adui atamkimbiza.

⁴Wameweka wafalme, nisiowaagiza mimi, wakaweka wakuu, nisiowajua!

Kwa fedha zao na kwa dhahabu zao wakajitengenezea vinyago,

kusudi viangamizwe tu.

⁵Ndama yako, Samaria, nimeitupa,

makali yangu yakapata kuwaka kwa ajili yao.

Mpaka lini wataweza kuendelea hivyo pasipo kutakaswa?

⁶Ilitokea kwao Waisiraeli, ni fundi aliyeitengeneza,

siyo Mungu, kwani itakuwa vumbi hiyo ndama ya Samaria.

⁷Kwa kuwa hupanda upepo, watavuna kimbunga,

mbegu zao hazioti majani, hazileti unga;

kama zingeuleta, wageni wangeula.

⁸Waisiraeli wamekwisha kumezwa: wako kwa wamizimu,

wanafanana na chombo kisichopendeza.

⁹Kwani ndio walioondoka kwenda Asuri,

wakawa kama punda wa porini anayejitembelea peke yake.

Efuraimu akajinunulia huko wagoni wampendao;

¹⁰lakini ijapo wawanunue kwa wamizimu, nitawapata na

kuwakusanya,

nao bado kidogo watagaagaa kwa kuumizwa na mizigo,

ambayo mfalme na wakuu waliwapagaza.

¹¹Kwani Efuraimu amejipatia pengi pa kutambikia

kwa ajili ya kukosa kwao,

napo hapo pa kutambikia pakawa pao pa kukosea.

¹²Ijapo nimwandikie mara elfu Maonyo yangu,

huwaziwa kwake kuwa mambo mageni tu.

¹³Wakitoa ng'ombe za tambiko za kuteketezwa nzima hula

nyama,

Bwana hapendezwi nao; sasa atazikumbuka manza zao,

awapatilizie makosa yao, nao watarudi Misri.

¹⁴Isiraeli alipomsahau Muumbaji wake, alijenga majumba

makuu;

Yuda naye akajenga miji mingi yenye maboma.

Nami nitatia moto mijini mwake,

uyale yale majumba yake matukufu.