Wokovu wao walio wake Mungu.

¹Nyika na nchi kavu, na mchangamke,

nalo jangwa na lipige vigelegele

kwa kuchipuka na kuchanua kama shamba la maua ya uwago.

²Litachipuka kweli na kuchanua,

lipige vigelegele na shangwe,

litapewa utukufu wa Libanoni

na urembo wa Karmeli nao wa Saroni;

hao watauona utukufu wa Bwana na urembo wa Mungu wetu.

³*Mikono iliyolegea itieni nguvu!

Nayo magoti yaliyojikwaa yashupazeni!

⁴Waambieni waliopotelewa na mioyo:

Jipeni mioyo, msiogope! Mtazameni Mungu wenu!

Lipizi linakuja, wanalipishwa na Mungu;

yeye ndiye atakayewaokoa ninyi.

⁵Hapo ndipo, yatakapofumbuliwa macho ya vipofu,

ndipo, yatakapozibuliwa masikio ya viziwi,

⁶ndipo, viwete watakaporukaruka kama kulungu,

ndipo, ndimi za mabubu zitakapopiga shangwe,

kwani maji yatabubujika nyikani, nayo mito jangwani.

⁷Mchanga wenye moto utageuka kuwa ziwa,

nayo nchi iliyokufa kwa kiu itatoka visima vya maji.

Penye makao na matuo ya mbweha

pataota nyasi na matete na magugu.

⁸Hata barabara iliyotengenezwa vizuri itakuwako,

nayo itaitwa Njia Takatifu;

mwenye machafu hataishika, ila itakuwa yao tu,

watakaoishika ya kukuendeako,

nao wajinga hawatapotelewa nayo.

⁹Simba hatakuwako kule,

wala nyama wakali wengine hawatakupanda,

hawataonekana huko kabisa.

Hivyo wale waliokombolewa wataendelea kuishika.

¹⁰Waliookolewa na Bwana watarudi,

waje Sioni na kupiga shangwe,

furaha za kale na kale zitawakalia vichwani pao,

machangamko na furaha zitawafikia,

lakini machungu yatakimbia, wasipige kite tena.*