Yesaya 42

Mtumishi wa Bwana ni mwanga wao wamizimu na kiongozi wao walio wake.

¹Mtazameni mtumishi wangu, nimshikizaye!

Mtazameni mteule wangu,

ambaye Roho yangu inapendezwa naye!

Nitamtia Roho yangu, awatolee wamizimu habari,

ya kwamba hukumu yao iko.

²Hatapiga kelele, wala hatalia,

wala hatapaza sauti yake njiani.

³Utete uliokunjika hatauvunja,

wala utambi unaotoka moshi bado hatauzima,

aitokeze ile hukumu kuwa ya kweli.

⁴Hatazimia, wala hatashindika,

mpaka yanyokayo ayashikize katika nchi,

navyo visiwa vitayangoja maonyo yake.

⁵Hivi ndivyo, anavyosema Mungu Bwana

aliyeziumba mbingu na kuziwamba,

aliyeitanda nchi na mazao yake;

watu walioko aliwapa pumzi,

nazo roho aliwapa wao watembeao huku.

⁶(Anasema:) Mimi Bwana nimekuita, kwa kuwa ni mwongofu,

na nikushike mkono wa kukulinda,

nikuweke kuwa agano la watu na mwanga wa wamizimu,

⁷ufumbue macho ya vipofu, utoe wafungwa kifungoni,

nao wakaao gizani uwatoe nyumbani, wanamolindwa.

⁸Mimi ni Bwana, hili ndilo Jina langu.

Sitampa mwingine utukufu wangu,

wala sitavipa vinyago mashangilio yangu.

⁹Mkitazama, yale ya kwanza yametimia,

tena sasa mimi ninatangaza mapya;

yanapokuwa hayajatokea bado, nawapasha ninyi habari zao.

¹⁰Mwimbieni Bwana wimbo mpya

na kumshangilia kwenye mapeo ya nchi,

ninyi mtembeao baharini nayo yote yaliyomo,

ninyi visiwa nao wakaao huko!

¹¹Nazo nyika na miji iliyoko ipaze sauti

pamoja na vijiji, Wakedari wakaamo!

Wakaao magengeni na wapige shangwe,

nako vilimani kileleni na wapige makelele!

¹²Na wamtukuze Bwana!

Na wayatangaze mashangilio yake visiwani!

¹³Bwana atatokea kama mwenye nguvu,

kama mpiga vita atauamsha ukali,

atapiga yowe na vilio, awatolee adui zake nguvu.

¹⁴Nimenyamaza tangu kale, nikatulia na kujizuia;

lakini sasa nitalia pamoja na kufoka na kutweta

kama mwanamke anayezaa.

¹⁵Nitachoma milima na vilima,

niyanyaushe majani yao yote,

nayo majito nitayageuza kuwa nchi kavu,

hata mabwawa nitayakausha.

¹⁶Lakini vipofu nitawatembeza katika njia, wasizozijua,

katika mikondo, wasiyoijua, nitawaendesha,

nitaligeuza giza lililoko mbele yao kuwa mwanga,

napo palipopotoka nitapanyosha.

Maneno haya nitayafanya, sitayaacha.

¹⁷Hapo watakuwa wamerudi nyuma kwa kutiwa soni kabisa

wao walioviegemea vinyago,

walioviambia vinyago vilivyoyeyushwa kwa shaba:

Ninyi m miungu yetu.

¹⁸Ninyi viziwi, sikilizeni!

Ninyi vipofu, chungulieni, mpate kuona!

¹⁹Kipofu yuko nani, asipokuwa mtumishi wangu?

Aliye kiziwi kama mjumbe wangu wa kumtuma yuko nani?

Yuko nani aliye kipofu kama mpendwa?

Yuko nani aliye kipofu kama mtumishi wa Bwana?

²⁰Uliona mengi, lakini hukuyaangalia;

alikuzibua masikio, lakini hayakusikia.

²¹Bwana kwa hivyo, alivyo mwongofu,

akapendezwa kuyakuza na kuyatukuza Maonyo.

²²Lakini sasa ukoo huu ni ukoo wa watu

walionyang'anywa na kupokonywa mali zao,

wote pia wamenaswa miinani,

wakafichwa nyumbani mwa kufungia watu,

wakatekwa, tena hakuna aliyewaopoa,

wakapokonywa mali zao, tena hakuna aliyesema: Rudisha!

²³Kwenu yuko nani atakayeyasikia hayo?

Yuko nani atakayeyaangalia atakapoyasikia huko nyuma?

²⁴Ni nani aliyemtoa Yakobo, apokonywe mali zake?

Ni nani aliyemtia Isiraeli mikononi mwa wanyang'anyi?

Si mimi Bwana, waliyemkosea,

walipokataa kuzishika njia zangu

na kuyasikia Maonyo yangu?

²⁵Ndipo, alipowamiminia makali yake

yaliyo yenye moto na makorofi ya vita,

yakamzunguka na kumchoma lakini hakujua maana,

yakamwunguza, lakini hayakumfikia moyoni.