Yesaya 61

Utume mwema wa kuja kwake mwokozi.

¹*Roho ya Bwana Mungu inanikalia,

kwa hiyo Bwana amenipaka mafuta,

niwapigie maskini mbiu njema.

Amenituma, niwaponye waliovunjika mioyo,

niwatangazie mateka, ya kuwa watakombolewa,

nao waliofungwa, ya kuwa watatolewa mafungoni,

²niutangaze mwaka wa Bwana upendezao

na siku ya lipizi ya Mungu wetu,

niwatulize mioyo wote wasikitikao,

³niwapoze mioyo yao wausikitikiao Sioni,

nikiwapa vilemba penye majivu

na mafuta ya furaha penye mavazi ya matanga

na mashangilio penye roho za kuzimia,

watu wawaite Mivule iongokayo

na Shamba la Bwana la kujipatia matukuzo.

⁴Watayajenga mabomoko yako ya kale,

nayo mahame ya siku za mbele watayasimamisha tena,

nayo miji iliyo machungu ya mawe tu watairudishia upya,

ndiyo iliyokuwa imeangamia kwao vizazi na vizazi.

⁵Wageni watasimama hapo wakiyachunga makundi yenu,

waliotoka nchi nyingine watakuwa wakulima wenu

na watunza mizabibu yenu.

⁶Nanyi mtaitwa watambikaji wa Bwana,

mtaambiwa: M watumishi wa Mungu wetu;

mapato ya wamizimu mtayala,

nayo matukufu yao yatakuwa mali zenu.*

⁷Penye soni walizotiwa watapata malipo mara mbili,

penye matusi watalishangilia fungu lao.

Kweli katika nchi yao watakuwa wenye mafungu mawili,

tena watapata kuchangamka kale na kale.

⁸Kwani mimi Bwana ninapenda maamuzi yapasayo,

nikachukiwa nayo yaliyopokonywa kwa upotovu,

kwa hiyo nitawapa kwa kweli yayapasayo matendo yao,

nitafanya nao agano la kale na kale.

⁹Mazao yao yatajulikana kwa wamizimu,

nao waliotoka miilini mwao watajulikana

katikati ya makabila ya watu;

wote watakaowaona watawatambua,

ya kuwa ndio mazao yaliyobarikiwa na Bwana.

¹⁰Kufurahi nitamfurahia Bwana,

roho yangu itampigia Mungu wangu shangwe,

kwani amenivika mavazi ya wokovu,

akanifunika kwa kanzu ya wongofu,

niwe kama mchumba mume,

akiutengeneza urembo wa kichwani kuwa kama wa mtambikaji,

au kama mchumba mke,

akijipamba na kuvaa vito vyake.

¹¹Kwani kama nchi inavyoyatoa machipukizi yake,

kama shamba linavyozichipuza mbegu zake,

ndivyo, Bwana Mungu atakavyochipuza wongofu

na mashangilio mbele ya wamizimu wote.