Wafuasi wa kike.

¹Kisha akatembea na kuingia mwenyewe mji kwa mji na kijiji kwa kijiji, akiutangaza Utume mwema wa ufalme wa Mungu nao wale kumi na wawili walikuwa pamoja naye,[#Luk. 4:43.]

²hata wanawake wengine waliokuwa wameponywa pepo wabaya na magonjwa; ndio Maria anayeitwa Magadalene aliyetokwa na pepo saba,[#Mar. 15:40-41; 16:9.]

³na Yohana, mkewe Kuza aliyekuwa mshika mali wa Herode, na Susana na wengine wengi, wakawatumikia na kuwagawia, waliyokuwa nayo.

Mfano wa mwenye kumiaga mbegu.

⁴*Lakini lilipokusanyika kundi la watu wengi na kumwendea toka kila mji, akasema kwa mfano:

⁵Mpanzi alitoka kuzimiaga mbegu zake. Ikawa, alipozimiaga, nyingine zikaangukia njiani, zikakanyagwa, nao ndege wa angani wakazila.

⁶Nyingine zikaangukia mwambani, zikaota, mara zikanyauka, kwa kuwa hazina mchanga mbichi.

⁷Nyingine zikaangukia miibani katikati, nayo miiba ikaota pamoja nazo, ikazisonga.

⁸Nyingine zikaangukia penye mchanga mwema, zikaota, zikazaa punje mia. Alipoyasema haya akapaza sauti kwamba: Mwenye masikio yanayosikia na asikie!

⁹Wanafunzi wake walipomwuliza maana ya mfano huu,[#Yes. 6:9-10.]

¹⁰akasema: Ninyi mmepewa kuyatambua mafumbo ya ufalme wa Mungu, lakini wale wengine huambiwa kwa mifano, kusudi watazame, lakini wasione, wasikilize, lakini wasijue maana.

¹¹Nao mfano maana yake ni hii: mbegu ndio Neno la Mungu.[#1 Petr. 1:23.]

¹²Zilizoko njiani ndio wenye kulisikia; kisha huja Msengenyaji, akaliondoa Neno mioyoni mwao, wasipate kulitegemea na kuokoka.

¹³Nazo zilizoko mwambani ndio hao: wanapolisikia Neno hulipokea kwa furaha, lakini hawana mizizi, hulitegemea kitambo kidogo, kisha siku za kujaribiwa hujitenga.

¹⁴Lakini zilizoangukia miibani ndio hao: wanalisikia, lakini huenda zao, Neno likisongwa nayo masumbuko na mali nyingi na furaha za ulimwenguni; hivyo hawaivishi punje.

¹⁵Lakini zilizoko penye mchanga mzuri ndio hao: wanalisikia Neno na kulishika katika mioyo iliyo mizuri na miema; ndio wanaozaa matunda kwa kuvumilia.*

Mfano wa taa.

¹⁶Hakuna mwenye kuwasha taa anayeifunika kwa chombo au anayeiweka mvunguni mwa kitanda; ila huiweka juu ya mwango, maana wanaoingia waone mwanga.[#Luk. 11:33; Mat. 5:15; Mar. 4:21.]

¹⁷Kwani hakuna ililofichwa lisiloonekana halafu; wala hakuna njama isiyotambulikana halafu na kutokea waziwazi.[#Mat. 10:26.]

¹⁸Basi, mwangalie, jinsi mnavyosikia! Kwani aliye na mali atapewa; lakini asiye na kitu atachukuliwa hata kile, alichokiwaza kuwa chake.[#Luk. 19:26.]

Mama na ndugu.

¹⁹Kisha mama yake na ndugu zake wakamjia, lakini hawakuweza kumfikia kwa sababu ya kundi la watu.

²⁰Alipopashwa habari kwamba: Mama yako na ndugu zako wamesimama nje, wanataka kuonana na wewe,

²¹akajibu akiwaambia: Mama yangu na ndugu zangu ndio hawa wanaolisikia Neno la Mungu na kulifanya.

Upepo wa baharini.

²²Ikawa siku moja, mwenyewe akajipakia chomboni na wanafunzi wake, akawaambia: Tuvuke kwenda ng'ambo ya ziwa! Wakatweka matanga.

²³Walipoendelea baharini, akalala usingizi. Kukashuka msukosuko wa upepo ziwani, chombo kikajaa maji, wakafikisha kuangamia.

²⁴Ndipo, walipomjia, wakamwamsha wakisema: Bwana, Bwana, tunaangamia! Naye alipoinuka, akaukaripia upepo na mawimbi ya maji, yakatulia, kukawa kimya.

²⁵Kisha akawaambia: Tegemeo lenu liko wapi? Kwa kuogopa wakastaajabu tu, wakasemezana wao kwa wao: Ni mtu gani huyu, ya kuwa anaagiza hata upepo na maji, nayo yanamtii!

Mgerasi mwenye pepo.

²⁶Walipokwisha kuvuka, wakafika katika nchi ya Wagerasi iliyoelekea Galilea.

²⁷Aliposhuka pwani akakutana na mwanamume wa mji ule aliyekuwa na pepo; huyo siku nyingi hakuvaa nguo, wala hakukaa nyumbani, ila hukaa penye makaburi.

²⁸Alipomwona Yesu akapiga kelele, akamwangukia, akapaza sauti akisema: Tuko na jambo gani, mimi na wewe Yesu, Mwana wa Mungu Alioko huko juu? Nakuomba wewe, usiniumize.

²⁹Kwani alikuwa amemwagiza yule pepo mchafu, amtoke yule mtu. Kwani mara nyingi alikuwa amemsukumasukuma, naye alikuwa amefungwa kwa minyororo na kwa mapingu na kulindwa, akavivunja vile vifungo, akakimbizwa na pepo kwenda mahali pasipo na watu.

³⁰Yesu alipomwuliza: Jina lako nani? akasema: Maelfu. Kwani alikuwa ameingiwa na pepo wengi.

³¹Nao wakambembeleza, asiwaagize kwenda zao kuzimuni.

³²Basi, kulikuwako kundi la nguruwe wengiwengi waliokuwako malishoni mlimani. Wakambembeleza, awape ruhusa ya kuwaingia wale. Alipowapa ruhusa,

³³pepo wakamtoka yule mtu, wakawaingia nguruwe; ndipo, kundi lilipotelemka mbio mwambani, wakaingia ziwani, wakatoswa.

³⁴Lakini wachungaji walipoliona lililofanyika, wakakimbia, wakalitangaza mjini na mashambani.

³⁵Watu wakatoka kwenda kulitazama lililofanyika; walipofika kwa Yesu, wakamwona yule mtu aliyetokwa na pepo, anavyokaa miguuni pa Yesu, amevaa nguo, tena ana akili zake, wakashikwa na woga.

³⁶Nao walioyaona wakawasimulia, mwenye pepo alivyoponywa.

³⁷Kwa hiyo watu waliokuwa wengi katika nchi za pembenipembeni za Wagerasi wakamwomba wote, aondoke kwao, kwani walishikwa na woga mkubwa. Alipojipakia chomboni, arudi,

³⁸yule mtu aliyetokwa na pepo akamwomba, afuatane naye. Lakini yeye akamwaga akisema:

³⁹Rudi nyumbani mwako, ukayasimulie yote, Mungu aliyokutendea! Ndipo, alipokwenda zake, akayatangaza katika mji mzima yote, Yesu aliyomtendea.

Binti Yairo

⁴⁰Yesu aliporudi, kundi la watu likampokea. Kwani wote walikuwa wakimngoja.

⁴¹Mara akaja mtu, jina lake Yairo; huyo alikuwa jumbe wa nyumba ya kuombea. Akamwangukia Yesu miguuni, akambembeleza, aje nyumbani mwake,

⁴²kwani mwanawe wa kike wa pekee aliyekuwa mwenye miaka 12 aliingia kufani. Alipokwenda naye, watu wengi sana wakamsongasonga.

⁴³Kukawa na mwanamke mwenye ugonjwa wa kutoka damu tangu miaka 12. Kwa kuwa hakuweza kuponywa na mtu ye yote,

⁴⁴akamjia nyuma, akaligusa pindo la nguo yake. Papo hapo kijitojito cha damu yake kikakoma.

⁴⁵Yesu akasema: Yuko nani aliyenigusa? Walipokana wote, Petero akasema: Bwana, makundi ya watu wanakusonga na kubanana.

⁴⁶Yesu akasema: Yuko aliyenigusa, kwani nimetambua, jinsi nguvu ilivyonitoka.

⁴⁷Yule mwanamke alipoona, ya kuwa hakufichika, akaja na kutetemeka, akamwangukia, akamweleza mbele ya watu wote sababu ya kumgusa na jinsi alivyopona papo hapo.

⁴⁸Naye akamwambia: Mwanangu, kunitegemea kwako kumekuponya, nenda na kutengemana![#Luk. 7:50.]

⁴⁹Angali akisema, akaja mtu wa jumbe wa nyumba ya kuombea, akasema: Binti yako amekwisha kufa, usimsumbue mfunzi tena!

⁵⁰Yesu alipoyasikia akamwambia: Usiogope nitegemea tu! Atapona.

⁵¹Alipoingia nyumbani hakumpa mtu ruhusa kuingia pamoja naye, ila Petero na Yohana na Yakobo na baba yake mwana na mama yake.

⁵²Kwa kuwa wote waliomboleza na kumlilia, akasema: Msilie! kwani hakufa, ila amelala usingizi tu.[#Luk. 7:13.]

⁵³Ndipo, walipomcheka sana, maana walijua, ya kuwa amekwisha kufa.

⁵⁴Kisha akamshika mkono wake, akapaza sauti akisema: Mtoto, inuka!

⁵⁵Papo hapo roho yake ikarudi, akafufuka; naye akawaagiza, apewe chakula.

⁵⁶Wazazi wake washangaa. Naye akawakataza, wasimwambie mtu lililofanyika.[#Luk. 5:14; Mar. 7:36.]