Kukonyoa masuke.

¹Siku zile Yesu alipita katika mashamba siku ya mapumziko; nao wanafunzi wake walipoona njaa wakaanza kukonyoa masuke, wakala.[#5 Mose 23:25.]

²Lakini Mafariseo walipoviona wakamwambia: Tazama, wanafunzi wako wanafanya yaliyo mwiko kuyafanya siku ya mapumziko.[#2 Mose 20:10.]

³Naye akawaambia: Hamkusoma, Dawidi alivyofanya alipoona njaa yeye na wenziwe?[#1 Sam. 21:6.]

⁴Hapo aliingia Nyumbani mwa Mungu, wakaila mikate aliyowekewa Bwana, nayo kuila ni mwiko kwake na kwa wenziwe, huliwa na watambikaji peke yao.[#3 Mose 24:9.]

⁵Tena hamkusoma katika Maonyo, ya kuwa siku za mapumziko watambikaji wa pale Patakatifu huivunja miiko ya siku ya mapumziko, nao hawakosi?[#4 Mose 28:9-10.]

⁶Lakini nawaambiani: Hapa yupo aliye mkuu kuliko Patakatifu.

⁷Lakini kama mngalitambua maana ya neno la kwamba:

Huruma ndizo, nizitakazo, lakini vipaji vya tambiko

sivyo, basi, hamngaliwawazia mabaya wasio na kosa.

⁸Kwani Mwana wa mtu ni bwana wa siku ya mapumziko.*

Mkono wa kupooza.

⁹Alipoondoka huko akaenda kuingia katika nyumba yao ya kuombea.

¹⁰Akaona mtu mwenye mkono uliokaukiana. Wakamwuliza wakisema: Iko ruhusa kuponya siku ya mapumziko? maana walitafuta la kumsuta.[#Luk. 14:3.]

¹¹Nay akawaambia: Mwenye kondoo mmoja tu akitumbukiwa naye shimoni siku ya mapumziko, kwenu yuko asiyemkamata na kumwopoa?

¹²Je? Mtu hapiti kondoo kabisa? Kwa hiyo iko ruhusa kufanya mema siku ya mapumziko.[#Luk. 14:5.]

¹³Ndipo, alipomwambia yule mtu: Unyoshe mkono wako! Nao, alipounyosha, ukageuka kuwa mzima kama ule mwingine.

¹⁴Lakini Mafariseo wakatoka, wakamlia njama ya kumwangamiza.[#Yoh. 5:16.]

Utete uliopondeka.

¹⁵Yesu alipoyatambua akaondoka kule.[#Mar. 3:7-12.]

¹⁶Watu wengi wakamfuata, akawaponya wote;[#Mat. 8:4.]

¹⁷lakini akawatisha, wasimtangaze, kusudi litimie, mfumbuaji Yesaya alilolisema:[#Yes. 42:1-4.]

¹⁸Tazameni, huyu ndiye mtoto wangu, niliyemchagua;

ni mpendwa wangu, ambaye Roho yangu inapendezwa naye.

Nitamtia Roho yangu, awatangazie wamizimu,

ya kwamba hukumu yao iko.

¹⁹Hatateta, wala hatapiga kelele,

wala mtu hatamsikia kinywa chake majiani.

²⁰Utete uliopondeka hatauvunja kabisa,

wala utambi unaotoka moshi bado hatauzima,

mpaka aitokeze ile hukumu kuwa ya kushinda.

²¹Jina lake ndilo, wamizimu watakalolingojea.

Kumbeza Roho.

²²Hapo akaletewa mwenye pepo aliyekuwa kipofu na bubu. Alipomponya, yule bubu akapata kusema na kuona.

²³Ndipo, makundi ya watu waliposhangaa wote wakisema: Kumbe huyu siye mwana wa Dawidi?

²⁴Mafariseo walipoyasikia wakasema: Huyu hafukuzi pepo, isipokuwa kwa nguvu ya Belzebuli aliye mkuu wa pepo.[#Mat. 9:34.]

²⁵Kwa kuyajua hayo mawazo yao, Yesu akawaambia: Kila ufalme unapogombana wao kwa wao huwa mahame tu, nao kila mji au nyumba tu inapogombana wao kwa wao haitasimamika.

²⁶Naye Satani akimfukuza Satani mwenziwe amejigombanisha mwenyewe. Basi, ufalme wake utasimamikaje?

²⁷Nami nikiwafukuza pepo kwa nguvu ya Belzebuli, Je? Wana wenu huwafukuza kwa nguvu ya nani? Kwa hiyo hao ndio watakaowaumbua.

²⁸Lakini mimi nikiwafukuza pepo kwa nguvu ya Roho ya Mungu, ufalme wa Mungu umekwisha kuwafikia ninyi.[#1 Yoh. 3:8.]

²⁹Au mtu atawezaje kuingia katika nyumba ya mwenye nguvu, aviteke vyombo vyake, asipomfunga kwanza yule mwenye nguvu? Kisha ataweza kuiteka nyumba yake.[#Yes. 49:24.]

³⁰Asiye wa upande wangu hunikataa; naye asiyekusanya pamoja nami hutapanya.[#Mar. 9:40.]

³¹Kwa hiyo nawaambiani: Kila kosa na kila neno la kumbeza Mungu watu wataondolewa, lakini la kumbeza Roho hawataondolewa.[#Ebr. 6:4,6; 10:26; 1 Yoh. 5:16.]

³²Mtu ye yote atakayesema neno la kumkataa Mwana wa mtu ataondolewa; lakini mtu atakayesema neno la kumkataa Roho Mtakatifu hataondolewa, wala katika ulimwengu huu wa sasa, wala katika ule utakaokuja.[#Luk. 12:10; 1 Tim. 1:13,19; Ebr. 10:26-27.]

³³Mkipanda mti nzuri, basi mtapata hata matunda mazuri. Au mkipanda mti mwovu, basi, mtapata hata matunda maovu. Kwani mti hutambulikana kwa matunda yake.[#Mat. 7:17.]

³⁴Enyi wana wa nyoka, mnawezaje kusema mema, mlio wabaya? Kwani moyo unayoyajaa, ndiyo, kinywa kinayoyasema.

³⁵Mtu mwema hutoa mema katika kilimbiko chake chema, lakini mtu mbaya hutoa mabaya katika kilimbiko chake kibaya.

³⁶Nami nawaambiani: Siku ya hukumu watu wataulizwa kila neno baya walilolisema.[#Yak. 3:6,9.]

³⁷Kwani kwa maneno yako utapata wongofu, vile vile utapata hukumu kwa maneno yako.

Kielekezo cha mfumbuaji Yona.

³⁸Hapo walikuwapo waandishi na Mafariseo, wakamwuliza wakisema: Mfunzi, twataka, ufanye kielekezo, tukione.[#Mat. 16:1.]

³⁹Naye akajibu akiwaambia: Wao wa ukoo huu mbaya wenye ugoni wanatafuta kielekezo, lakini hawatapata kielekezo, ila kielekezo cha mfumbuaji Yona.

⁴⁰Kwani kama Yona alivyokuwa tumboni mwa nyangumi siku tatu mchana na usiku, vivyo naye Mwana wa mtu atakuwa ndani ya nchi siku tatu mchana na usiku.[#Yona 2:1-2.]

⁴¹Siku ya hukumu waume wa Niniwe watauinukia ukoo huu, wauumbue; kwani walijuta kwa tangazo la Yona. Tena tazameni, hapa yupo anayempita Yona![#Yona 3:5.]

⁴²Yule mfalme wa kike aliyetoka kusini atauinukia ukoo huu siku ya hukumu auumbue. Kwani yeye alitoka mapeoni kwa nchi, aje kuusikia werevu wa Salomo uliokuwa wa kweli. Tena tazameni, hapa yupo anayempita Salomo![#1 Fal. 10:1-10.]

⁴³Pepo mchafu anapomtoka mtu hupita mahali pasipo na maji akitafuta kituo asikione.

⁴⁴Halafu husema: Nitarudi nyumbani mwangu, nilimotoka. Anapokuja huiona, ni tupu, tena imefagiwa na kupambwa;

⁴⁵ndipo, anapokwenda kuchukua pepo saba wengine walio wabaya kuliko yeye, wawe wenziwe; nao huingia, wakae humo: hivyo ya mwisho ya mtu yule yatakuwa mabaya kuliko ya kwanza. Ndivyo, vitakavyowapata wao wa ukoo huu ulio mbaya.[#2 Petr. 2:20.]

Mama na ndugu.

⁴⁶*Alipokuwa akisema bado na makundi ya watu, mara mama yake na ndugu zake walikuwa wakisimama nje kwa kumtaka, waseme naye. Mtu akamwambia:[#Mat. 13:55.]

⁴⁷Tazama, mama yako na ndugu zako wamesimama nje kwa kutaka, waseme na wewe.

⁴⁸Naye akajibu akimwambia yule aliyesema naye: Mama yangu ni nani? Nao ndugu zangu ni akina nani?[#Luk. 2:49.]

⁴⁹Akawanyoshea wanafunzi wake mkono, akasema: Watazameni walio mama yangu na ndugu zangu!

⁵⁰Kwani mtu ye yote atakayeyafanya, ayatakayo Baba yangu alioko mbinguni, huyo ndiye ndugu yangu na dada yangu na mama yangu.*[#Yoh. 15:14; Rom. 8:29; 2 Kor. 5:16; Ebr. 2:11.]