Mgonjwa wa kupooza.

¹*Akaingia chomboni, akavuka, akafika mjini mwake yeye.[#Mat. 4:13.]

²Papo hapo wakamletea mgonjwa wa kupooza aliyelala kitandani. Yesu alipoona, walivyomtegemea, akamwambia mwenye kupooza: Tulia, mwanangu! Makosa yako yameondolea.

³Ndipo, waandishi waliokuwako waliposema mioyoni: Huyu anambeza Mungu.[#Mar. 2:7.]

⁴Kwa kuyajua hayo mawazo yao Yesu akasema: Mbona mnawaza mabaya mioyoni mwenu?[#Mat. 12:25; Yoh. 2:25.]

⁵Kwani kilicho chepesi ni kipi? kusema: Makosa yako yameondolewa! au kusema: Inuka, uende?

⁶Lakini kusudi mpate kujua, ya kuwa Mwana wa mtu ana nguvu ya kuondoa makosa nchini, - basi, akamwambia mwenye kupooza: Inuka, jitwishe kitanda chako, uende nyumbani kwako!

⁷Ndipo, alipoinuka akaenda nyumbani kwake.

⁸Lakini makundi ya watu walipoyaona wakaogopa, wakamtukuza Mungu aliyewapa watu nguvu kama hizo.*

Kuitwa kwa Mateo.

⁹*Yesu alipotoka huko, aende zake, akaona mtu anayeitwa Mateo, amekaa forodhani. Akamwambia: Nifuata! Akainuka, akamfuata.

¹⁰Ikawa, alipokaa chakulani nyumbani mwake, ndipo, walipokuja watoza kodi na wakosaji wengi, wakakaa chakulani pamoja na Yesu na wanafunzi wake.

¹¹Mafariseo walipowaona wakawaambia wanafunzi wake: Kwa nini mfunzi wenu anakula pamoja na watoza kodi na wakosaji?[#Luk. 15:2.]

¹²Yesu alipoyasikia akasema: walio wazima hawapaswi na mganga, ila walio wagonjwa.[#Luk. 16:15; Rom. 3:23.]

¹³Lakini nendeni zenu, mkajifunze maana ya neno hili:

Huruma ndizo, nizitakazo, lakini vipaji vya tambiko sivyo. Kwani sikujia kuwaita wongofu, ila wakosaji.*

Kufunga.

¹⁴Ndipo, walipomjia wanafunzi wa Yohana wakisema: Kwa nini sisi na Mafariseo hufunga, lakini wanafunzi wako hawafungi?[#Mat. 11:19; Luk. 18:12.]

¹⁵Yesu akawaambia: Walioalikwa arusini hawawezi kusikitika hapo, bwana arusi akingali pamoja nao. Lakini siku zitakuja, watakapoondolewa bwana arusi; ndipo, watakapofunga. Hakuna mtu anayetia kiraka cha nguo mpya katika kanzu chakavu,[#Yoh. 3:29; Ufu. 22:17.]

¹⁶kwani kinaondoa pote paliposhonwa katika kanzu, hivyo tundu lake litakuwa kubwa zaidi.[#Yoh. 1:17.]

¹⁷Wala watu hawatii mvinyo mpya katika viriba vichakavu; kwani wakiitia mle, viriba vitapasuka, mvinyo imwagike, navyo viriba vitaangamia. Ila hutia mvinyo mpya katika viriba vipya; hivyo vyote viwili vitakaa.[#Rom. 10:4; Gal. 5:1.]

Binti Yairo.

¹⁸*Alipokuwa akiwaambia haya, mara akaja jumbe, akamwangukia akisema: Binti yangu amekufa sasa hivi; lakini uje umbandikie mkono wako! mdipo atakapokuwa mzima tena.

¹⁹Yesu akaondoka, akafuatana naye pamoja na wanafunzi wake.

²⁰Mara akaja mwanamke mwenye kutoka damu miaka 12, akamjia nyuma, akaligusa pindo la nguo yake,

²¹maana alisema moyoni: Hata nikiigusa nguo yake tu nitapona.[#Mat. 14:36.]

²²Lakini Yesu akageuka, akamwona, akasema: Tulia, mwanangu! Kunitegemea kwako kumekuponya. Yule mwanamke akapona saa ileile.

²³Yesu alipoingia nyumbani mwa jumbe akawaona wapiga filimbi na kundi la watu, wakiomboleza,

²⁴akasema: Ondokeni! Kwani kijana hakufa, ila amelala usingizi tu; ndipo, walipomcheka sana.[#Yoh. 11:11; 14:25.]

²⁵Lakini wale watu walipokwisha fukuzwa, akaingia, akamshika mkono wake; ndipo, yule kijana alipoinuka.

²⁶Habari hizi zikatoka, zikaenea katika nchi ile yote.*

Vipofu wawili.

²⁷Yesu alipotoka huko, aende zake, wakamfuata vipofu wawili, wakapaza sauti za kuita: Tuhurumie, mwana wa Dawidi!

²⁸Alipoingia nyumbani, wale vipofu wakamjia. Yesu akawauliza: Mwanitegemea kwamba: Naweza kufanya hivyo? Wakamwambia: Ndio, Bwana.

²⁹Ndipo, alipowagusa macho akisema: Hayo, mliyoyategemea, na myapate vivyo hivyo![#Mat. 8:13.]

³⁰Ndipo, macho yao yalipofumbuka. Kisha Yesu akawakemea akisema: Angalieni, mtu hata mmoja asiyasikie haya![#Mat. 8:4.]

³¹Lakini wale walipotoka wakamsimulia po pote katika nchi ile yote.

Bubu.

³²Hao walipotoka, mara wakamletea bubu aliyepagawa na pepo. Naye pepo alipokwisha fukuzwa, yule bubu akaweza kusema.

³³Makundi ya watu wakastaajabu wakisema: Tangu zamani havijaonekana katika Isiraeli vilivyo kama hivi.

³⁴Lakini Mafariseo wakasema: Nguvu ya mkuu wa pepo ndiyo, huyu anayofukuzia pepo.[#Mat. 12:24-32.]

³⁵*Yesu akawa akizunguka mijini mote na vijijini, akawafundisha katika nyumba zao za kuombea, akautangaza Utume mwema wa ufalme, akaponya ugonjwa wote na unyonge wote.[#Mat. 4:23.]

³⁶Lakini alipowatazama makundi ya watu akawaonea uchungu, kwani walikuwa wamechoka kwa kuteswa na kutawanyishwa kama kondoo wasio na mchungaji.[#Mat. 14:14; Mar. 6:34; Ez. 34:5-6.]

³⁷Ndipo, alipowaambia wanafunzi wake: Mavuno ni mengi, lakini watenda kazi ni wachache.[#Luk. 10:2.]

³⁸Mwombeni mwenye mavuno, apeleke watenda kazi katika mavuno yake!*