Nehemia analimaliza jengo la boma.

¹Kisha Sanibalati na Tobia na Mwarabu Gesemu nao adui zetu wengine wakasikia, ya kuwa nimelijenga boma, usisalie ufa humo; lakini siku zile sijatia bado milango malangoni.

²Ndipo, Sanibalati na Gesemu walipotuma kwangu kwamba: Njoo, tukutane pamoja penye vijiji vilivyomo bondeni kwa Ono! Kwani waliwaza kunifanyizia mabaya.

³Nikatuma wajumbe kwao kwamba: Mimi nina kazi kubwa ya kuifanya, kwa hiyo siwezi kushuka. Mbona niiache kazi hii, ikome, nikishuka kuja kwenu?

⁴Wakatuma kwangu kama mara nne kuniambia maneno yayo hayo, nami nikawajibu yayo hayo.

⁵Kisha Sanibalati akatuma kijana wake kwangu mara ya tano kuniambia yayo hayo, hata barua iliyo wazi ilikuwa mkononi mwake.

⁶Humo yalikuwa yameandikwa haya: Katika wamizimu yanasimuliwa, naye Gasemu anayasema, ya kuwa wewe na wayuda mnawaza kumwinukia mfalme, kwa sababu hii unalijenga boma, wewe upate kuwa mfalme wao, na mengine kama hayo.[#Ezr. 4:12.]

⁷Umeweka hata wafumbuaji, wakutangaze mle Yerusalemu kwamba: Huyu ni mfalme katika nchi ya Yuda! Maneno kama hayo mfalme naye atasimuliwa, kwa hiyo njoo sasa, tupige shauri pamoja!

⁸Kisha nikatuma kwake kwamba: Mambo kama hayo, unayoyasema wewe, hayakufanyika, ila wewe unayatunga mwenyewe moyoni mwako.

⁹Kwani wao wote walitaka kutuogopesha tu kwa kwamba: Hivyo mikono yao italegea, isifanye kazi, jengo hilo lisimalizike. Sasa wewe Mungu, ishupaze mikono yetu!

¹⁰Mimi nikaenda kuingia nyumbani mwa Semaya, mwana wa Delaya, mwana wa Mehetabeli, naye alikuwa amefungiwa; akaniambia: Na tukutane Nyumbani mwa Mungu, katikati ya Jumba hilo, tuifunge milango ya Jumba hilo, kwani wako wanaokuja kukuua, nao watakuja usiku huu, wakuue.

¹¹Nikamjibu: Mtu kama mimi anawezaje kutoroka? Tena mtu kama mimi akiingia humo Jumbani atawezaje kupona? Sitakuja.

¹²Nalikuwa nimetambua, nikaona, ya kuwa siye Mungu aliyemtuma, aniambie huo ufumbuaji, ila Tobia na Sanibalati walikuwa wamempenyezea mali.

¹³Naye alipenyezewa mali, kusudi niingiwe na woga, niyafanye hayo ya kumkosea Mungu, wapate kulitokeza jina langu kuwa baya, wanitukane.[#4 Mose 18:7.]

¹⁴Mungu wangu, yakumbuke hayo matendo ya Tobia na ya Sanibalati! Mkumbuke naye mfumbuaji mke Noadia na wale wafumbuaji wengine waliotaka kuniogopesha![#Neh. 4:4-5.]

¹⁵Boma likamalizika siku ya ishirini na tano ya mwezi wa Eluli kwa siku hamsini na mbili.

¹⁶Adui zetu wote walipoyasikia haya, wakaogopa wao wamizimu wote waliokaa na kutuzunguka, wakazimia kabisa machoni pao kwa kujua, ya kuwa jengo hilo limefanywa kwa nguvu zitokazo kwake Mungu.

¹⁷Tena katika siku hizo, walikuwako wakuu wa miji ya Wayuda waliompelekea Tobia barua nyingi, nazo za Tobia zikafika kwao.

¹⁸Kwani katika nchi ya Yuda walikuwako wengi waliomwapia kumsaidia, kwani alikuwa mkwewe Sekania, mwana wa Ara; naye mwanawe Yohana alimwoa binti Mesulamu, mwana wa Berekia.

¹⁹Mimi nami wakanisimulia mambo yake mema, nayo niliyoyasema wakamtolea. Hata Tobia mwenyewe akatuma kwangu barua za kuniogopesha.