Kuwatenga wenye uchafu.

¹Bwana akamwambia Mose kwamba:

²Waagize wana wa Isiraeli, watoe makambini wote walio wenye ukoma nao wote walio wenye kisonono nao wote waliojipatia uchafu kwa kugusa mfu.

³Sharti mwatoe, kama ni mume au kama ni mke, na kuwatuma kwenda nje ya makambi, wasiyachafue makambi, mimi ninamokaa katikati yao.[#4 Mose 12:14; 35:34.]

⁴Wana wa Isiraeli wakayafanya na kuwatuma kwenda nje ya makambi; kama Bwana alivyomwambia Mose, ndivyo, wana wa Isiraeli walivyoyafanya.

Vipaji vya tambiko vya upozi.

⁵Bwana akamwambia Mose kwamba:

⁶Waambie wana wa Isiraeli: Mtu mume au mke akifanya kosa lo lote la kimtu na kumvunjia Bwana maagano, mtu huyo atakuwa amekora manza.[#3 Mose 6:2-7.]

⁷Hao sharti wayaungame makosa yao, waliyoyafanya, kisha wazilipe manza zao, walizozikora, na kumrudishia mwenyewe, waliyemkosea, mali zake sawasawa na kuongeza fungu la tano.

⁸Kama mtu huyo hakuacha ndugu anayepasa kupewa hayo malipo ya manza, sharti Bwana apewe hayo malipo ya manza, yawe yake mtambikaji, wakiisha kutoa humo dume la kondoo kuwa ng'ombe ya tambiko ya upozi ya kumpatia upozi.

⁹Navyo vipaji vyote vya tambiko, wana wa Isiraeli watakavyovitoa kuwa vitakatifu vya kumnyanyulia Bwana, na wampelekee mtambikaji, navyo vitakuwa vyake.[#4 Mose 18:8.]

¹⁰Vipaji vyo vyote, mtu atakavyovitoa kuwa vitakatifu, vitakuwa vyake mtambikaji, navyo vyote, mtu atakavyompa mtambikaji, vitakuwa vyake.

Vilaji vya tambiko vya wivu na maji ya kiapizo.

¹¹Bwana akamwambia Mose kwamba:

¹²Sema na wana wa Isiraeli na kuwaambia: Kama mke wa mtu anakosa na kumvunjia mumewe maagano yake,

¹³mtu akilala naye kwa ugoni, vikafichika machoni pa mumewe, asijulikane, ya kuwa amejichafua, kwa kuwa hakuwako shahidi, wala hakufumaniwa,

¹⁴lakini wivu ukiwaka moto rohoni mwake mumee, amwonee mkewe wivu kwa kwamba amejichafua, au pengine wivu ukiwaka moto rohoni mwake mumewe, amwonee mkewe wivu, naye haujichafua,

¹⁵basi, vikiwa hivyo sharti mume ampeleke mkewe kwa mtambikaji pamoja na kumpelekea toleo lake, vibaba viwili vya unga wa mawele, lakini asiumiminie mafuta, wala asiweke uvumba juu yake, kwani ni kilaji cha tambiko cha wivu, tena ni kilaji cha tambiko cha ukumbusho cha kukumbushia manza, alizozikora.

¹⁶Naye mtambikaji na ampeleke huyo mwanamke, amsimamishe mbele yake Bwana,

¹⁷kisha mtambikaji achote maji matakatifu kwa chombo cha udongo, kisha achote hata vumbi kidogo lililoko chini Kaoni, alitie katika hayo maji.[#2 Mose 30:18.]

¹⁸Mtambikaji akiisha kumsimamisha huyo mwanamke mbele ya Bwana na kuzifungua nywele za kichwani pake, na ampe mkononi mwake hicho kilaji cha tambiko cha ukumbusho, nacho ni kilaji cha tambiko cha wivu, lakini yale maji machungu yenye maapizo mtambikaji sharti ayashike mkononi mwake.

¹⁹Kisha mtambikaji na amwapishe na kumwambia huyo mwanamke: Kama mtu hakulala kwako, nawe hukukosa na kujichafua ukimtumia mwingine kuwa kama mumeo, hutapatwa na apizo lo lote la haya maji machungu yenye maapizo.

²⁰Lakini kama umekosa na kujichafua ukimtumia mwingine kuwa kama mumeo, mtu ye yote akilala kwako kwa ugoni asiye mumeo, basi, yatakupata.

²¹Kisha mtambikaji na amwapishe huyo mwanamke kwa kiapo cha kuapiza, mtambikaji akimwambia huyo mwanamke: Bwana na akuweke kuwa kielekezo cha kuapizwa katikati yao walio ukoo wako akivipoozesha viuno vyako pamoja na kulivimbisha tumbo lako!

²²Nayo maji haya yenye maapizo na yaingie mwilini mwako, yalivimbishe tumbo lako pamoja na kuvipoozesha viuno vyako! Naye huyo mwanamke sharti aitikie na kusema: Amin. Amin.

²³Kisha mtambikaji na ayaandike haya maapizo chuoni na kuyafuta kwa yale maji machungu.

²⁴Kisha na amnyweshe huyo mwanamke hayo maji machungu yenye maapizo, yamwingie.

²⁵Kisha mtambikaji na akichukue kilaji cha tambiko cha wivu mkononi mwa mwanamke, akipitishe motoni mbele ya Bwana na kumtolea mezani pa kutambikia.

²⁶Hapo mtambikaji na achukue gao moja la kilaji cha tambiko kilicho cha ukumbusho wake mwanamke, akichome moto mezani pa kutambikia, kisha amnyweshe mwanamke yale maji.

²⁷Akiisha kumnywesha hayo maji, naye akiwa amejichafua na kumvunjia mumewe maagano yake, basi, hayo maji machungu yenye maapizo yatakapomwingia yatalivimbisha tumbo lake pamoja na kuvipoozesha viuno vyake; ndivyo, huyu mwanamke atakavyokuwa ameapizwa kwao walio ukoo wake.

²⁸Lakini kama mwanamke huyu hakujichafua, akiwa ametakata, hatapatwa na jambo lo lote, ila atazaa watoto tena.

²⁹Haya ndiyo maonyo yao wenye wivu, mwanamke akiwa amekosa na kujipatia uchafu kwa kutumia mwingine kuwa kama mumewe,

³⁰au wivu ukiwaka moto rohoni mwa mtu, amwonee mkewe wivu, amsimamishe huyo mwanamke mbele ya Bwana, mtambikaji amfanyizie mambo yote ya haya maonyo.

³¹Hapo mumewe atakuwa hana manza zo zote tena, lakini mwanamke aliye hivyo hana budi kujitwika manza, alizozikora.