Kualika watu, waje kuerevuka.

¹Waje kujua werevu wa kweli na kuonyeka,[#1 Fal. 4:29-32.]

²wajue kutambua maneno ya utambuzi,

³waje kuonyeka, wapate akili,

tena wapate wongofu na mashauri mema yaongokayo,

⁴waerevushe wajinga,

nao wavulana wawajulishe kuwaza mambo mioyoni!

⁵Naye mwerevu wa kweli ayasikie, auongeze ujuzi wake,

naye mtambuzi ajipatie wongozi mwema.

⁶atambue mifano na vitendawili,

hata maneno ya werevu wa kweli na mafumbo yao!

⁷Kumcha Bwana ndio mwanzo wa ujuzi,

lakini wajinga huubeza werevu wa kweli kwa kukataa kuonyeka.

⁸Mwanangu, sikia, baba yako akikuchapa,

usiyabeue maonyo ya mama yako!

⁹Kwani hayo ni kilemba kipendezacho kichwani pako

na mkufu wa pambo shingoni pako.

Kuonya watu, wasidanganyike.

¹⁰Mwanangu wakosaji wakikubembeleza, usiwaitikie!

¹¹Wakikuambia: Twende pamoja, tuvizie kumwaga damu,

tena tumwotee bure asiyekosa,

¹²kama kuzimu tuwameze, wakingali wa hai,

wao wamchao Mungu wawe kama wengine washukao shimoni,

¹³tuzipate mali zao zote zenye kima,

tuzijaze nyumba zetu mateka,

¹⁴kisha nawe utapiga kura pamoja nasi,

sisi sote pia tutakuwa bia moja tu:

¹⁵mwanangu, hao usishike njia moja nao,

uzuie mguu wako, usikanyage mikondo yao!

¹⁶Kwani miguu yao hukimbilia mabaya,

hupiga mbio kuja kumwaga damu.

¹⁷Ni bure, wavu ukiwa umetandwa

machoni pao wote walio wenye mabawa.

¹⁸Hivyo wao huvizia kumwaga damu zao wenyewe

na kuziotea roho zao wenyewe.

¹⁹Ndivyo, zilivyo njia zao wote wanaotamani mali tu,

maana giza huzichukua roho zao wenyewe.

Mapatilizo yao wasiosikia.

²⁰Werevu wa kweli hupiga mbiu barabarani,

huipaza sauti yake viwanjani;

²¹hutangaza pembeni penye njia pasipo na makelele mengi,

napo pa kuingia malangoni, namo mjini husema maneno yake:

²²Mpaka lini mtayapenda mapumbavu, ninyi wapumbavu?

nanyi wafyozaji mtapendezwa na ufyozaji mpaka lini?

nanyi wajinga mtauchukia ujuzi mpaka lini?

²³Geukeni kwa kuonywa na mimi!

Mtaniona, nikiwamwagia roho yangu,

nikiwajulisha maneno yangu.

²⁴Kwa kuwa niliwaita, mkakataa kunisikia,

kwa kuwa niliukunjua mkono wangu,

lakini hakuwako aliyeuangalia,

²⁵mkayaacha mashauri yangu yote,

hamkutaka kuonywa na mimi:

²⁶kwa hiyo mimi nami nitacheka, mkiangamia,

nitawasimanga, mastuko yatakapowajia;

²⁷hayo mastuko yatawajia kama mvua yenye umeme,

nao mwangamizo utawatukia kama upepo wa kilazoni,

nayo masongano na mahangaiko yatawajia.

²⁸Hapo ndipo, watakaponiita, lakini sitawaitikia,

watanitafuta kwa bidii tangu asubuhi, lakini hawataniona.

²⁹Kwa kuwa waliuchukia ujuzi,

hawakutaka kumcha Bwana,

³⁰wala hawakuyapenda mashauri yangu,

wakakataa po pote kuonywa na mimi,

³¹kwa hiyo watayala mazao ya njia zao,

wayashibe mashauri yao.

³²Kwani kurudi nyuma kwao wajinga kutawaua,

nako kujikalia tu kwao wapumbavu kutawaangamiza.

³³Lakini atakayenisikia atakaa na kutulia,

atatengemana pasipo kuona kibaya kitakachomstusha.