Mifano 27

Mtu asijivune!

¹Usijivunie siku ya kesho!

Kwani huyajui, hiyo siku utakayoyazaa.

²Mwingine na akusifu, kisiwe kinywa chako!

Mgeni akusifu, lakini isiwe midomo yako!

³Jiwe ni zito, nao mchanga ni mzigo,

lakini masikitiko ya mpumbavu ni mazito kuliko yote mawili.

⁴Makali huwaka moto, nayo machafuko hufurikia,

lakini awezaye kusimama penye wivu yuko nani?

⁵Kuonywa waziwazi ni kwema

kuliko kupendwa na mtu avifichaye.

⁶Vidonda, anavyokutia mpenzi wako, vina maana ya kweli,

lakini asiyekoma kukunonea ni mchukivu.

⁷Roho ya mtu ashibaye hubeza hata asali iliyo safi,

lakini roho ya mtu aliye na njaa huona nayo machungu kuwa matamu.

⁸Kama ndege aliyekimbia tunduni mwake

ndivyo, alivyo mtu aliyekimbia kwao.

⁹Mafuta na uvumba hufurahisha moyo, nao utamu wa mpenda mwenziwe,

huu ndio unaotoka katika mashauri mema ya roho.

¹⁰Usimwache mwenzio wala mwenziwe baba yako!

Wala mwake ndugu yako usimwingie siku, ulipopatwa na mabaya!

Mtu akaaye karibu na mwema kuliko ndugu alioko mbali.

¹¹Mwanangu, erevuka kweli, uufurahishe moyo wangu,

nipate kumjibu mtu, akinitukana!

¹²Mwerevu wa kweli akiona mabaya kujificha,

lakini wajinga hupita tu, wakapatwa nayo.

¹³Zichukue nguo zake yeye aliyejitoa kuwa dhamana ya mwingine,

kwa ajili ya mwanamke mgeni mnyang'anye mali zake!

¹⁴Mtu akimbariki mwenziwe kwa sauti kuu asubuhi na mapema

huwaziwa, ya kuwa amemwapiza.

¹⁵Maji yasiyokoma kuchuruzika toka mchirizini siku ya mvua nyingi

na mwanamke mgomvi ni sawasawa;

¹⁶awezaye kumzuia aweza kuuzuia nao upepo,

mkono wake wa kuume huweza kushika nayo mafuta yauingiayo.

¹⁷Chuma hunoa chuma;

ndivyo, mtu na uso wa mwenziwe wanavyonoana.

¹⁸Alindaye mkuyu hula kuyu zake,

naye awaangaliaye mabwana zake hupata macheo.

¹⁹Kama majini uso unayvoelekea uso,

ndivyo, moyo wa mtu unavyouelekea moyo wa mwenziwe.

²⁰Kuzimu nako, watu wanakopotelea, hakushibi,

vivyo hivyo nayo macho ya watu hayashibi.

²¹Chungu cha kuyeyushia hujaribu fedha, nayo tanuru hujaribu dhahabu,

lakini mtu hujaribiwa nayo, vinywa vya watu vinayomsifia.

²²Ijapo umtwange mjinga kwa mchi katika kinu pamoja na mchele,

ujinga wake hautamtoka.

²³Sharti ujue vema, jinsi makundi yako yalivyo,

kauelekeze moyo wako kuwaangalia nao ng'ombe!

²⁴Kwani kilimbiko hicho nacho sicho cha kale na kale,

au kiko kilemba cha kifalme kikaliachao vizazi na vizazi?

²⁵Majani makavu yakiisha kuondolewa, hutokea mabichi,

nako milimani hukusanywa majani mazuri ya kula.

²⁶Wana kondoo hukupatia mavazi yako,

nayo madume ni malipo ya kununua shamba.

²⁷Tena yako maziwa ya mbuzi yatoshayo kukulisha wewe

na kuwalisha nao waliomo nyumbani mwako,

hata kuwa posho ya watumishi wako wa kike.