Mifano 29

Werevu wa kweli huleta mbaraka, ujinga na ukosaji huangamiza.

¹Mtu aonwaye akishupaza shingo

mara atavunjika, asione atakayemponya.

²Waongofu wakipata nguvu, watu hufurahi,

lakini asiyemcha Mungu akitawala, watu hupiga kite.

³Mtu apendaye werevu wa kweli humfurahisha baba yake,

lakini mtu akiwa mwenzao wanawake wagoni huzipoteza mali.

⁴Mfalme huishikiza nchi yake kwa kupiga mashauri yaliyo sawa,

lakini aitozaye kodi nyingi huiangamiza.

⁵Mtu amwambiaye mwenziwe maneno mororo humtegea tanzi,

ainase miguu yake.

lakini mwongofu hupiga shangwe kwa kufurahi.

⁶Mtu mbaya hujitegea mwenyewe kwa upotovu wake,

lakini mwongofu hupiga shangwe kwa kufurahi.

⁷Mwongofu huyajua mashauri ya wanyonge,

lakini asiyemcha Mungu hautambui huo ujuzi.

⁸Wenye ufyozaji huuchafua mji,

lakini wenye werevu wa kweli huyatuliza makali.

⁹Mtu mwerevu wa kweli akishindana na mjinga,

huyu hukasirika, tena hucheka, mambo yasipate kutulia.

¹⁰Wamwagao damu humchukia asiyekosa,

lakini wanyokao hutafuta njia ya huiponya roho yake.

¹¹Mpumbavu hutoa ukali wote wa roho yake,

lakini mwerevu wa kweli huuzuia, apate kuunyamazisha.

¹²Mtawalaji akisikiliza maneno ya uwongo,

watumishi wake wote huacha kumcha Mungu.

¹³Maskini na mkorofi hukutana,

aliyewapa wote wawili mwanga wa macho ni Bwana.

¹⁴Mfalme akataye mashauri ya wanyonge kwa kweli,

kiti chake cha kifalme kitashupaa kale na kale.

¹⁵Fimbo na mapigo humwerevusha mtu kweli,

lakini mwana aliyeachiliwa tu humtia mama yake soni.

¹⁶Wasiomcha Mungu wakipata nguvu, wapotovu huwa wengi,

lakini waongofu hufurahia maanguko yao.

¹⁷Mchape mwanao! Ndivyo, atakavyokupatia utulivu

akiifurahisha roho yako vizuri.

¹⁸Pasipo kufumbuliwa mambo watu hawazuiliki,

lakini ayaangaliaye Maonyo hufanikiwa.

¹⁹Kwa maneno tu mtumishi haonyeki,

kwani huyatambua, lakini hayatii.

²⁰Ukiona mtu ajihimizaye kusema maneno,

basi, mpumbavu huegemeka kuliko huyo.

²¹Mtu akimtunza mtumishi wake kwa upole tu toka utoto,

mwisho yeye atakuwa kibwana.

²²Mtu mkali huzusha magomvi,

naye akasirikaye upesi hufanya mapotovu mengi.

²³Majivuno humnyenyekeza mtu,

lakini anyenyekeaye rohoni hupata macheo.

²⁴Afanyaye bia na wezi hujichukia mwenyewe,

akisikia maapizo hamjulishi aliyeapizwa.

²⁵Kuogopa watu ni kujitegea tanzi,

lakini amwegemeaye Bwana hulindwa.

²⁶Wengi hutafuta upendeleo wa mtawalaji,

lakini kwake Bwana kila mtu huyapata yampasayo.

²⁷Mtu mwovu hutapisha waongofu,

naye ashikaye njia inyokayo humtapisha asiyemcha Mungu.