Ufunuo 3

Barua kwa wateule wa Sarde.

¹Malaika wa wateule walioko Sarde mwandikie: Ndivyo anavyosema yeye aliye mwenye zile roho saba za Mungu na mwenye zile nyota saba. Nayajua matendo yako, unalo jina la kuwa unaishi, lakini u mfu.[#Ufu. 1:16; 5:6.]

²Amka, uyashupaze masao yanayotaka kufa nayo! Kwani sikuyaona matendo yako, ya kuwa yametimilika mbele ya Mungu wangu.[#Ufu. 3:19; Ez. 34:4.]

³Kumbuka, uliyoyapokea! Nayo uliyoyasikia, yashike, upate kujuta! Usipokesha, nitakuja kama mwizi, usiitambue saa, nitakayokujia wewe.[#1 Tes. 5:2.]

⁴Lakini unayo majina machache huko Sarde wasiozichafua nguo zao. Ndio watakaoenenda pamoja nami wenye nguo nyeupe, kwani zimewapasa.[#Yuda 23.]

⁵Mwenye kushinda atavikwa naye nguo nyeupe, nalo jina lake sitalifuta katika kitabu cha uzima. Nami nitaliungama jina lake mbele ya Baba yangu na mbele ya malaika zake.[#Ufu. 4:4; 6:11; 7:9,13; Sh. 69:29; Mat. 10:32; Fil. 4:3.]

⁶Mwenye masikio na asikie, Roho anayowaambia wateule!

Barua kwa wateule wa Filadelfia.

⁷Malaika wa wateule walioko Filadelfia mwandikie: Ndivyo, anavyosema yeye Mtakatifu aliye mwenye kweli, aliye hata mwenye ufunguo wa Dawidi. Atakapofungua, hatakuwako awezaye kupafunga tena; atakapofunga, hatakuwako awezaye kupafungua.[#Yes. 22:22.]

⁸Nayajua matendo yako, tazama mbele yako nimekupa mlango ulio wazi, tena hakuna awezaye kuufunga. Kweli nguvu, ulizo nazo, ni ndogo, lakini umelishika Neno langu, hukulikana Jina langu.[#1 Kor. 16:9.]

⁹Tazama, nitakupa wanafunzi wa Satani wanaojisema kuwa Wayuda, lakini sio, ila husema uwongo. Tazama, nitawaleta hao, waje, wakuangukie penye miguu yako, watambue, ya kuwa mimi nimekupenda wewe.[#Ufu. 2:9; Yes. 49:23; 60:14.]

¹⁰Kwa sababu umelishika Neno langu la uvumilivu, nitakulinda nami, nikuokoe katika saa ya majaribu itakayopafikia pote panapokaa watu kwamba: Wakaao nchini wajaribiwe.[#Ufu. 13:10; Rom. 8:25; 1 Kor. 10:13; Ebr. 10:36.]

¹¹Ninakuja upesi. Shikamana nayo, uliyo nayo, mtu asikitwae kilemba chako![#Ufu. 1:3; 2:5,10.]

¹²Mwenye kushinda nitamfanya kuwa nguzo Jumbani mwa Mungu wangu, asitoke tena nje. Nami nitamwandika Jina la Mungu wangu na jina la mji wa Mungu wangu, la Yerusalemu mpya, utakaoshuka toka mbinguni kwake Mungu wangu. Nitamwandika hata Jina langu jipya.[#Ufu. 14:1; 19:12; 21:2; 22:4; Yes. 62:2; Gal. 2:9; 4:26.]

¹³Mwenye masikio na asikie, Roho anayowaambia wateule!

Barua kwa wateule wa Laodikia.

¹⁴Malaika wa wateule walioko Laodikia mwandikie: Ndivyo, anavyosema yeye Amin aliye shahidi mwelekevu na mkweli, aliye wa kwanza wa viumbe vyote vya Mungu.[#Ufu. 1:5; Yoh. 1:3; 2 Kor. 1:20; Kol. 1:15.]

¹⁵Nayajua matendo yako, wewe huzizimiki, wala huzizimuki. Ungefaa ukiwa mwenye kuzizimika au mwenye kuzizimuka.[#Ufu. 2:2.]

¹⁶Lakini sasa, kwa kuwa u mwenye kuvuvuwaa, usiwe mwenye kuzizimika wala mwenye kuzizimuka, nitakutema kinywani mwangu.

¹⁷Kwani unasema: Mimi niko na mali, ninayo malimbiko yangu, hakuna, nilichokikosa. Nawe hujui, ya kuwa wewe u mnyonge, unapaswa na kugawiwa, u maskini na kipofu na mwenye uchi.[#1 Kor. 3:18; 4:8.]

¹⁸Nakuonyesha mzungu, ndio huu: nunua kwangu dhahabu iliyong'azwa na moto, upate kuwa mwenye mali! Nunua nazo nguo nyeupe, upate kuvaa, uchi wako usionekane, ukakutia soni! Nunua nayo mafuta ya macho, uyapake macho yako, upate kuona![#Ufu. 16:15; Yes. 55:1; 1 Petr. 1:7.]

¹⁹Wote, ninaowapenda mimi, nawaonya na kuwapiga. Kwa hiyo jikaze, ujute![#Fano. 3:12; 1 Kor. 11:32; Ebr. 12:6.]

²⁰Tazama, nimesimama mlangoni nikipiga hodi. Mtu atakayenisikia sauti yangu, akaufungua mlango, basi, nitaingia mwake, nile pamoja naye, naye ale pamoja nami.[#Luk. 12:36; Yoh. 14:23.]

²¹Mwenye kushinda nitampa kukaa pamoja nami kitini pangu pa kifalme, kama mimi nami nilivyoshinda, nikakaa pamoja na Baba yangu kitini pake pa kifalme.[#Mat. 19:28.]

²²Mwenye masikio na asikie, Roho anayowaambia wateule!